Minnesota, Nailur:
Kawei ka samla 28 snem na Minnesota, kaba la ithuh kum ka Nicole Hammond, ka la shah pyniap dusmon habar ka jaka trei jongka bad kane ka la jia ha u Risaw jong u snem 2022 hadien ba la bunsien ka la kyntait ia ka jingleit leh jan jong utei u para ba iatrei lang bad ka, u Michael J. Carpenter.
U Carpenter u la don 38 snem ka rta bad la ong ba utei u runar u la siat ia ka Hammond na ki bynta jong u ryndang hapoh ka jaka set kali jong ka jaka trei jongki ha Dubow Textile, ha kaba baroh arngut ki iatrei lang. Kumta, ha kane ka taiew ba la lah, la ong ba ka ïingbishar ka la bishar bniah bha halor kane ka jingjia bad ka la rai ban pynngat kyndon pynkheiñ aiñ kaba jur ia u Carpenter, ha kaba la rai ban set patok syndon ia u baroh shi jingim, khlem da buh ia ka bai jamin bad ym nym don shuh mano- mano ruh ba lah ban pyllait ne ban iasaid naka bynta jong u hadien ba la lap ia baroh kitei ki sabut kiba biang halor ka jingpyniap bad jingthmu leh sniew jong u ia katei ka samla ha utei u snem.
La ong ba katei ka la jia ha utei u snem 2022 bad kumba la iohi ia ka jingiakren jongki lyngba ka mobile phone jong ka Hammond, ha kaba ka la kyntait ban ialeh ieid bad u Carpenter bad naduh kitei ki jingiakren ‘messages’ ruh ka la dep pynshai bad byrngem lypa ba kan ym ailad ne shah ia u ba un ktah ne leh eiei ia ka wat lada kin iakynduh lang ha ka jaka trei kumba ju long man ka sngi. Namar la ong ba wat ki para ba iatrei lang bad ka Hammond ruh ki ju iohi ia katei ka jingpynthud jong utei u runar ia katei ka samla, hynrei kim ju nud ban tuklar ne ban leit ujor sha ki bor pynïaid namar ki shim ba ka long ka kam shimet jongki.
Kumta, ka ïingbishar ha kane ka sien ka la shim ia kane ka rai ban pynioh ia ka hok jong katei ka samla bad kumjuh ruh ban pynsuk mynsiem ia ki bahaiing- hasem bad ki paralok- parajor jongka kiba ju ieid bad kynjah ia ka naduh ba ka la leit noh na kane ka sla pyrthei bad ha katei ka sngi, ka ïingbishar ka la phah biang ia ka jingsngewlem sha ki bahaiing bad ki paralok jongka Hammond kum ka jingkynmaw ia katei ka jingjia kaba la wan jia ha ka iing- ka sem jongki ha utei u snem, kaba khlem poi pyrkhat ba katei ka samla kaba ju ioh bha ka jingiaroh naduh ka jingiadei kam bad ki paralok ne ki bahaiing ha sem bad kumjuh ruh ha ka jaka trei jongka, ka la shu duh ei ia ka jingim tang ha ka shi khyllipmat jong ka jingkwah brai jong utei u runar uba kwah ban ioh ktah ia ka.
La ong ba ka Hammond, ha ka jingshisha ka dang thmu ban sdang noh da ka kam khaii- pateng ba thymmai ha katei ka por shuwa ba kan shah pyniap noh. Ka Hammond ka thmu ban plie ia ka dukan die jingdeng pynitynnad ba rem-dor hynrei la ong ba kitei ki jingthmu bad jing angnud jongka baroh ki la shu pulom ei noh tang ha ki jingphohsniew jongka marwei namar katei ka jingleh pynkheiñ aiñ jong utei u runar uba la nud ban shim noh syndon ia ka jingim jongka tang namar ba kam treh ban leh ia kaba u kwah.
