Shillong, Nailur 29
Ka Ri-Bhoi District Sports Association bad ka Shillong Sports Association ki la wan ha ka kyrdan ba nyngkong ha ka Zone-C jong ka Meghalaya Youth League 2024 ha ka jingpynkut jong ka jingïalehkai (round robin) ba khatduh ha ka sngi Saitjaiñ.
Ïa kane ka lympung ïalehkai ba la pynïaid da ka Meghalaya Football Association ryngkat ka jingkyrshan jong ka tnad ïalehkai, la sakhi ïa ka jinglah ban thep palat 500 tylli ki kol kiba la thep ha kylleng ki 144 tylli ki jingïalehkai jong ka kyrdan ïalehkai U-14 bad U-16 kiba la pynlong kylleng ka jylla.
Da ka jingpynkut ïa ka round robin, la pynthikna ïa ki jaka ba khatduh na ka bynta ki kynhun kiba ïoh rung sha ka quarter final, ha kaba ki 8 tylli ki kynhun kiba wan ha ki kyrdan ba hakhlieh kin ïakynduh lang ha Shillong naduh ka 5 tarik u Risaw na ka bynta ban ïoh rah ïa ka nam lahduh ha kane ka lympung.
Baroh lai tylli kiwei pat ki zone ki la pyndep ïa ki jingïalehkai jong ki, hynrei ki don ar tylli ha kawei pat kiba la pynkynriah noh ha ka Zone-C. Kine ki jingïalehkai ki long kiba kongsan bha namar kin sa rai kano ka kynhun kaba ïoh ïa ka lad ban bat ïa ka kyrdan kaba nyngkong. Ka RBDCA ka dei ka kynhun kaba dangtam ïa ka SSA shwa jong ka jingïalehkai ha ka sngi Saitjaiñ bad ka la lah ban bat ïa katei ka kyrdan hadien ba baroh ar kynhun ki la khur ïa ka jingjop.
Ha ka U-14, ka Ri-Bhoi ka la pynliem ïa ka Riwar Mihngi Football Association da 11-0 kol ha Umdihar Mini Stadium, ha kaba u Ribanshan Kyrsian bad u Meland Mawiong ki la khur ïa ki hat-trick da kaba thep mar lai kol. Na ka bynta ka Shillong kaba la long ha madan MFA, u Adriel Branyden W. Nongbet u la khur ïa ka hat-trick na ka bynta ban pynliem ïa ka Sohra Sports Association da 8-0 kol.
Nangta ka U-16 ka Ri-Bhoi ka la jop da 7-0 kol pyrshah ïa ka Riwar Mihngi, katba ka Shillong ka la pynliem ïa ka Sohra da 12-1 kol, ha kaba u Baniar Kharsahnoh u la ïoh ban thep haduh saw kol bad u paralok ïalehkai u Ïaisanlang Dohling u la thep lai kol. Wat hadien ba ki la shah thep da ki phew kol, ki khynnah ïalehkai Sohra ki la pyrshang ban ïakhun tyngeh ha kaba ka la ïoh ban pynphai shi kol lyngba u Sanmehaki Shangpliang. Ka Sohra ka la pyni ïa ki sap ïalehkai, hynrei kam shym la lah ban kynjoh sha ka thong bad ka dangdonkam ban wanphai da ka jingkhlaiñ bor ha kawei pat ka Meghalaya Youth League ka ban sa long biang ha u snem ban wan.
Kumba ka paw ki kynhun kiba la rung sha ka Quarter Final na ka Zone-A ki long ka Tura District Football Association bad North Garo Hills District Sports Association ha ka kyrdan U-14 bad ka Williamnagar District Sports Association bad North Garo Hills ha ka kyrdan U-16.
Kiwei par pat ki kynhun kiba la rung Quarter final na kiwei pat ki lai tylli ki zone ki long ka West Jaiñtia Hills District Sports Association bad ka Amlarem Block Sports Association (U-14 bad U-16) na ka Zone-B, kumjuh ka Ri-Bhoi bad Shillong (U-14 bad U-16) na ka Zone-C, katba ka Nongstoiñ District Sports Association bad ka Pyndeng-umïong District Sports Association (U-14 and U-16) n aka Zone-D.
Na ka liang ka MFA shen kan sa pyllait ïa ka prokram ïalehkai quarter final hashwa ban sdang ka jingïalehkai.
