Nongstoiñ, Nailur 30
Ki ar tylli ki kynhun ïalehkai na West Khasi Hills ba kynthup ïa ka Mawlarshong SC na ka Nongstoiñ District Sports Association kan ïakhun pyrshah ïa ka Seinduli SC kaba na Mawshynrut SA ha ka play-off qualifier na ka bynta ka Meghalaya State League (MSL) 2024 ha West Khasi Hills Zone.
U Dr. Lumbor L. Mawsor, Tournament Director ka MSL 2024 ba la thung ruh da ka Meghalaya Football Association (MFA) ha ka kyrwoh khubor ba la phah, u la ong ba ka West Khasi Zone jong ka MFA ka pyntip ba kan pynlong ïa ki play-off qualifier na ka bynta ka MSL 2024 hapdeng kitei ar tylli ki kynhun ha ka 2 tarik u Risaw ha madan Mawkadiang, West Khasi Hills ka ban sdang ha ka por 1 baje mynsngi.
Shuh shuh u la ong ruh ba ha ka 8 tarik pat ha ka por 1 baje mynsngi ka jingïalehkai kan long hapdeng ka Lumsohkhlur SC na ka Pyndengumïong DSA kan ïakhun pyrshah ïa kawei na ki kynhun kaba la jop na ka 2 tarik, kata ka Seinduli lane ka Mawlarshong SC.
U Dr.Lumbor u la ruh ba na ka liang ka West Khasi Zone jong ka MFA ka la wer ïa baroh ki riew ïeid phutbol jong ka thaiñ ba kin wan ban sakhi ïa kitei ki jingïalehkai bad ka dor tiket kan long T.50 /- marwei.
Kumban shu pynkynmaw ka kynhun kaba rah ïa ka nam lahduh na West Khasi Zone kan ïoh ban leit ïakhun ïa ka MSL -2024 ka ban sdang naduh 26 tarik u Risaw.
Shuh shuh u la ong ruh ba ïa ka MSL 2024 yn pynlong ha ki 6 tylli ki jaka kata ha Khliehriat, Wahïajer, Shillong, Tyrsad, Mawkyrwat bad ha Tura.
