Khliehriat, Risaw 01
Ka Mutong YWSC bad ka Rymbai Sports YWO ki la ïoh jingjop ha ka lympung ïalehkai Third Division Football Tournament ba la pynïaid da ka East Jaiñtia District Football Association (EJDFA).
Ha ka jingïalehkai kaba la long ha ka Sngi Ba-ar ha madan Artificial Turf Deinshynrum, ka Mutong YWSC ka la pynliem noh ïa ka Cham Cham SSC da 2-1 kol. Tang mar ïasdang ka Mutong ka la ïoh ban pynkhih jar lyngba u Deimonkiru Dkhar ha ka minit nyngkong.
Hadien katto-katne por ba la bteng ïa ka kylla miet ka Cham Cham ka la lah ban pynphai kylla shi kol lyngba u Wilroes Phawa ha ka minit kaba 48. Ka Mutong ka la la thep biang ïa ka kol kaba ar lyngba u Defence Phawa ha ka minit kaba 55 na ka bynta ban ïoh jingjop syndon.
Haba phai sha kawei pat ka jingïakhun kaba ar, ka Rymbai Sports YWO ka la pynliem noh ïa ka Lama Youth SSC da 2-1 kol.
Ha kane ka jingïakhun ka Lama Youth SSC ka la ïoh ban pynkhih jar nyngkong eh ha ka minit kaba 13 lyngba u Hajanmi Rymbai. Hynrei ka Rymbai Sports ka la lah ban pynphai kylla ar kol lyngba u Solify Swer ha ka minit kaba 42 bad Eme Rymbai ha ka minit kaba 52.
