Shillong, Risaw 01
Ka Meghalaya Athletics Association (MAA) ka la pynbna ïa ki kyrteng jong ki nongïalehkai athletics ki ban mihkhmat ïa ka Jylla sha ka lympung ïalehkai 35th East Zone Junior Athletics Championship ka ban long ha Bhubaneshwar, Odisha naduh 7 haduh ka 9 tarik mynta u bnai.
Ha kane ka lympung ki khynnah ka Jylla kin ïashim bynta ha ka kyrdan ïalehkai kaba hapoh 14, 16, 18 bad hapoh 20 snem ka rta.
Ïa kitei ki khynnah la lah ban sei madan mynta hadien ba ki la lah ban ïalehkai bha ha ka State Level Inter District ba la pynïaid da ka tnat ïalehkai jong ka Sorkar Jylla.
Kumta ïa kane ka kynhun yn ïalam da ki Athletic Coach kiba kynthup ïa ka Kong Daisy Marweiñ, ka Kong Fidellia Sun bad u Pleasantly Synnah.
Ki kyrteng jong ki nongïalehkai ki long U-14 shynrang ki long u Daldrobath D. Marak, Wanchiang K. Marak , Rikangku D. Sangma bad u John Milton Sohphoh. Ha ka liang ki kynthei (U-14) ki long ka Althea C.L. Nongpyiur, Amandy Rumnong , Leryang G. Marak & Fraryca Nongrum.
Ki nongïalehkai ki ban mihkhmat ha ka U-16 ki shynrang ki long Brilliance S. Marak, Bettingstar N. Sangma, Eslyrikkamsrang K. Marak, Saidul Ali, katba na ka liang ki kynthei ki long ka Kasanchi Donesa Marak, Enriyana G. Momin, Rukini R.T Dkhar, Sibilda Maring, Tusame Marak bad ka Turoi Phawa.
Ha ka U-18 ki don tang san ngut ki nongïalehkai shynrang bad kynthei ba la shah jied ban mihkhmat sha kane ka lympung bad kine ki long u Henry Yoga A Sangma, Rishanmehi Ryngkhlem, Knerlang Phawa, Lyntijingkyrmen Kharjahrin bad ka Melibad Kro .
Ha ka U-20 jong ki shynrang ki long u Renaldi Dhar, Donbok Shabong, Pringchang N. Sangma bad u Simeon Marak. Katba na ka liang ki khynnah kynthei ki long ka Damika R. Lyngdoh, Bethylene G. Makri, Rinalis Ingti bad ka Anrisha Klein.
Shwa ba kane ka kynhun kan mih na kane ka jylla na ka liang ki nongialam ka Meghalaya State Olympic Association ba kynthup ïa u Working President u Bah John F. Kharshiing, ryngkat u Secretary ka MAA u Bah Finely L. Pariat ki la ai khublei kitbok ïa baroh ki khynnah ba kin ïalehkai bha ha katei ka lympung khnang ba ki lah ban ïoh ïa ka jingjop.
