Shillong, Risaw 01
Ka Manipur bad ka Sikkim ki la ïoh jingjop ha ka lympung ïalehkai 1st Senior Women’s Inter-state Friendship T20 Tournament 2024 ha ka Sngi Ba-ar ha madan kriket Pahamsning kaba ha Ri-Bhoi.
Ha kane ka jingïakhun ka Manipur ka la pynliem noh ïa ka Arunachal Pradesh da 3 wiket bad ka dang sah sa 7 bol ha ka Group-A, katba ka Sikkim ka la jop da 4 wiket ïa ka Nagaland bad ka dang sah ha kti sa 8 bol ha ka Group-B.
Ki nongïalehkai ba pawkhmat ki long ka Monica Devi Ningthoujam na Manipur kaba la lah ban khur 5/13 ha ki 4 over pyrshah ïa ka Arunachal, ka Samayita Roy Prodhan, kaba la kamai 55 run na ki 43 bol na ka bynta ka Sikkim, kynthup ïa 6 tylli ki ‘four’ bad ar tylli ki ‘six’.
Ka Arunachal haba tied nyngkong hadien ba jop ïa kynting pisa, ka la kamai 101 run bad shah pynhap 8 wiket ha ki 20 over. Ka Nabam Abhi ka la ïoh 23 run haba sdang ban tied lang bad ka Nabam Yapu kaba ïoh 21 run (not out). Ka Monica kam shym la ailad satia ïa kino-kino ki nongtied jong ka Arunachal ban ïalehkai bha naba ka la lah ban shim 5 wiket.
Haba wan shimti ïa pali ba ar ka Manipur ka la ïoh 3/3 ha shwa ba ka Chingkheileima Chanu Mangsatabam (32 run na ki 51 bol) na ka bynta ban pynurlong ban kynjoh sha ka thong ha kaba kut. Ka Sarpik Ligu (3/13) ka la long a nongkawang bol kaba kynsai na ka bynta ka Arunachal.
Hadien kata, ka Nagaland ka la ïoh ban tied nyngkong hadien ba ka Sikkim ka la jop ïa ka jingkynting pisa bad ka la kamai 103 run bad shah pynhap 3 wiket ha ki 20 over. Ka Sentilemla Imsong (33 run na ki 32 bol) bad ka Limatola Ao (21 run na ki 19 bol) ki la lah ban ïalehkai bha. Katba ka Pramila Limboo ka la khur 2/17 ha ki 4 over na ka bynta ka Sikkim.
Ka Samayita ka la lah ban ïalehkai bha na ka bynta ka Sikkim na ka bynta ban kynjoh sha ka shiteng spah run. Hadien ba ka Sikkim ka la kynjoh sha ki 76/4, ka la donkam sa 28 run na ka bynta ban khur ïa ka jingjop. Te kumta lyngba ka jinglah ban ïalehkai bha da ka Anjeel Lepcha na ka bynta ban kamai 18 run na ki 14 bol ka la pynlong ïa ka Sikkim ban kynjoh sha ka thong.
Ha ka sngi Balang ka Meghalaya kan pynkhreh ban ïakhun pyrshah ïa ka Manipur naduh ka por 9 baje mynstep bad bud sa ka Sikkim pyrshah ïa ka Mizoram naduh ka por 12:30 mynsngi. Kine kin dei ki jingïalehkai ba kongsan shwa ka semifinal ka ban long jong ka Sngi Thohdieng. Ka Meghalaya ka la ïakhaid bad ka Arunachal ha ka jingïakhun ba nyngkong, katba ka Mizoram ka la shah rem ha ka Nagaland, kumta baroh ar tylli ki kynhun kin pynkhreh ban ïakhun tyngeh ha kane ka lympung.
