Kathmandu, Risaw:
Ka India ha ka Lah Sngi U Blei ka la pynbna ia ki ‘Helpline Numbers’ na ka bynta ki nongshong shnong ka India kiba sahkut ha Nepal namar ki jingjia shlei um bad ki jingtwa khyndew ha kine ki khyndiat sngi ba la leit. La ong ba ki nong India ki lah ban phone sha ki bor pynïaid ka ri India ha utei u nombar ba la ai, khnang ba kin lah ban ioh ia ka jingïarap ba kyrpang na ka Sorkar India.
Kane ka jingpynbna na ka sorkar India ka long hadien ba la iohi ia ka jingshlei um bad jingtwa khyndew ha Nepal ha kane ka taiew ba la dep kaba la wanrah ia ki jingjulor ba bun ha kylleng ki bynta jong katei ka ri.
Ha ka jingpynbna lyngba ka ‘Twitter’, ka tnat Embassy jong ka India hapoh Nepal ka la pynpaw ka jingsngewkhia halor katei ka jinglyngshop ki bor mariang hapoh Nepal, kaba la wanrah jingeh ruh ia ki nong India kiba don ha katei ka ri namar ki la sahkut noh bad kim ioh shuh ban wanphai biang sha la ri hadien ba ki la dep ia ki kam- ki jam jong ki na katei ka ri.
Katei ka tnat ka la iathuh ruh ba ka la ioh jingtip halor ki nong India kiba sahkut ha katei ka ri namar ki jinglynshop jong ki bor ka mariang bad kumta ka tnat ka dang ialeh ruh ban iatrei lang bad ki bor pynïaid ka Nepal na ka bynta ban ioh leit shaw ia kitei ki nong India.
Namarkata, la ong khnang ban pynsuk ia katei ka tnat ban ioh jingtip shaphang kitei ki nong India kiba don ha katei ka ri, ka la pynbna ia ki 3 tylli ki nombor phone ba ki paidbah nong India kiba sahkut ha Nepal kin ioh ban phone bad phah ia ki jingtip sha katei ka tnat.
Haba iadei bad kane, la ong ba ka jingdon jong kiba khlad na kitei ki jingshlei um bad jingtwa khyndew ha Nepal, ka la jan kot ia ka 200 ngut tad haduh jong ka Lah Sngi U Blei, ha kaba 30 ngut pat ki dei kiba dang jah rngai bad 194 kiwei pat ki dei kiba la mynsaw ha kitei ki jingjia.
Ki tnat bad ki kynhun iarap jong ka Nepal ki la ioh ruh ban pyllait im pat ia kumba 4,500 tam ki paidbah na kitei ki thaiñ ba mad ia ka jingshlei um.
Katkum ka jingai jingkheiñ jong ka Sorkar Nepal, la ong ba ki don palat 1,300 tam ki iing briew kiba la julor bad 19 tylli ki surok bah ha kylleng jong katei ka ri, kiba la julor bad kiba la sangeh treikam noh namar kitei ki jingjia ha kane ka taiew ba la dep.
