Imphal, Risaw:
Ki shipai pahara ha Manipur ki la pynjur shuh shuh ïa ka leit khynra ha kylleng ki jaka ba marjan bad ki jaka ba sha kyndong kiba don ha baroh ar kata ha ki jaka lum bad ki jaka them. Ha ka por ba la don ka jingleit khynra ha ka shnong Donjang, Churachandpur distrik, ki bor pahara ki la ioh ban kurup ïa lai tylli ki suloi kiba deng kiba la shna hi, ïa kiba la tip ha ka thaiñ kum ki “Pumpis,” ryngkat bad ar tylli ki kuli Pumpi ki bym pat pyndonkam.
Kumba ka paw, la ong ba ki jinglong jingman ha kane ka thaiñ ki la ïaid beit ïaid ryntih da ka jingdon jong ki jingleit khynra bad pahara jong ki bor pahara. Ha ka jingpyntreikam, ki bor pahara ki la ïaleh shitom na ka bynta ban pynïaid beit ïa ki rukom pynpoi ïa ki marbam bad ki jingdonkam kiba man ka sngi da kaba pynthikna ïa ka jingïaid biet khlem shah pynthut jong ki 251 tylli ki kali ha ka NH-37 bad 206 tylli ki kali ha ka NH-2.
La pynjur ïa ka jingpahara jong ki pulit bad ki shipai ha ki thaiñ ba kham mih ki jingïakynad, khnang ban lah ban pynpoi ïa ki mar kumba ki dei ban poi sha kylleng ki jaka. Shuh shuh la ïathuh ba la buh ruh haduh 109 tylli ki jaka ban khmih bniah ne ki Naka ha kylleng ka jylla Manipur.
Wat hapdeng kine ki jingpyntreikam, ym shym la don kano kano ka jingpynkheiñ aiñ, bad ym shym la don ki briew ki ban shah kem, ha kaba kane ka la pynpaw ba kine ki jingpyntreikam ki long kiba jop halor ka jingthmu ban wanrah bad ban pynneh ïa ka jingsuk bad jingshngaiñ ha ka jylla.
