Kolkata, Risaw:
Ki doktor khynnah kiba dang ïai bteng ïa ka jingïakhih da kaba shah thngan haduh ban da ïap ha ka Sngi U Blei ha ka thaiñ Dharmatala jong ka Kolkata, ki la dawa ïa ka jingbishar bahok na ka bynta ka doktor kaba la shah leh be-ijot bad shah pynïap ha RG Kar Medical College and Hospital, bad ban pynlong ïa ka jaka trei jong ki kaba don jingshngaiñ. Kiba bun ki doktor, kiba la don bynta ha ka jingïakhih naduh ka Sngi Saitjaiñ, ki la don jingthmu ban ïasnohktilang bad ka kynhun jong ki doktor khynnah na ka bynta ka jingïakhih shah thngan.
“Kum shi bynta ban ai jingkyrshan halor ka jingïakhih, ki riewpaidbah ki la ai mynsiem bad pynpaw ka jingsngew na ka bynta ban bteng ïa ka jingïakhih ban pyrshah halor ka jingjia kaba sngewshyrkhei ïa ka doktor. Ngi la dap da ka jingkmen bad ïoh mynsiem haba ïohi ba ki paidbah ki tur ban sakhi ba ka lanot kam pat ïoh ïa ka jingbishar bahok bad kumjuh halor ka jingïai bteng jong ki jingshah leh donbor jong ki doktor bad kumjuh la sakhi ba ka sorkar jylla kam pat shim khia ei ei na ka bynta ban pynurlong ïa ki jingdawa ba ngi la buh,” la ong u Debasish Halder, uwei na ki doktor uba la don bynat ha ka jingïakhih.
Ki hynriew ngut ki doktor kiba la shong shah thngan ki kynthup ïa ka doktor Snigdha Hazra, Tanaya Panja bad Anustup Mukhopadhyay jong ka Kolkata Medical College and Hospital, jong ka SSKM Hospital u dei u doktor Arnab Mukhopadhyay, ka Pulastha Acharya jong ka NRS Medical College and Hospital, bad ka Sayantani Ghosh Hazra jong ka KPC Medical College.
Ki doktor khynnah ki la sdang ban pynlong ïa ka jingïakhih shah thngan jong ki haduh ban da ïap ha ka miet jong ka Sngi Saitjaiñ hadien ba ka sorkar jylla kam shym leh ei ei kumba la ïakut ha ki 24 kynta ban pynurlong ïa ki jingdawa jong ki kaba la long haduh ka por 8.30 mynmiet jong ka Sngi Saitjaiñ.
Kine ki doktor ha ka Sngi Thohdieng ki la pynlong ïa ka jingïakhih da kaba shong ha lad Dorina kaba don ha ka thaiñ Dharmtatala ha kaba hadien kane ki la shah pynibor ha ki pulit ka Kolkata. Khnang ban pyni ïa ki jingshisha, ki doktor ki la buh da ki CCTV Camera ha ka jaka ba la pynlong ïa ka jingïakhih.
Ka sorkar jylla kan sa hap ban shim ka jingkitkhlieh lada jia ba kem pang ki doktor kiba pynlong ïa ka jingïakhih shah thngan, la ong ki doktor. Ki la don bun ngut ki riewpaidbah kiba la ïalum bad ker tawiar ha kane ka jaka ba la shah thngan ki doktor bad ki la don ruh kumba katto katne ngut ki ‘riewpawkhmat kiba la don bynta ha ka jingïakhih naduh ka miet jong ka Sngi Saitjaiñ.
