Shillong, Risaw 08
U MLA ka Mawkynrew Constituency u Bah Banteidor Lyngdoh u la ai khublei kitbok-kitrwiang lem bad ka song pisa sha u Skhemborlang Marweiñ, uba la mih na ka nongbah ban leit ïashim bynta sha Bangkok, Thailand.
Ha katei ka jingleit shim bynta, u Skhemborlang un pynkhreh ïa ki lai tylli ki jingïakhun kata ha Thai Fight Leaque ka ban sa long ha Lumpenee ha ka 9 tarik mynta u bnai, kumjuh ha Rajadamnem Stadium bad ha ka Fartex Fight.
Kat kum ka jingpynpaw da u President ka Muay Thai Association of Meghalaya u Bah Anjelus Sun u la pynpaw ba lada u Skhemborlang u lah ban khur ïa ka jingjop ha ka Fartex, un ïoh rung sha ka kawei pat ka jingïakhun jong ka One World Championship ka ban sa long ha u snem ban wan.
Ha kawei pat ka liang u Bah A. Sun u la ai khublei ryngkat ki jingkyrkhu kyrdoh ba un lah ban ïalehkai bha bad ruh ban wanrah ïa ka nam bad burom ïa ka ri bad ka Jylla hi baroh kawei.
Ha kajuh ka por u la ai khublei ruh ïa u Bah Banteidor uba la kloi ban ai jingïarap na ka por sha kapor na ka bynta ba ki jingdonkam jong ki khynnah ïalehkai haba ki leit shim bynta shabar na la ka jong ka Jylla.
