Imphal, Risaw:
U President jong ka seng Congress ha Manipur u K. Meghachandra Singh um shym la leit mih hakhmat ka kynhun Enforcement Directorate na ka bynta ka jingshah khot hajir halor ka jingshah kynnoh donkti jong u ha ka jingkamai ïa ka spah bymhok ïa kaba la pynngat hapoh ka Prevention of Money Laundering Act 2002 (PMLA).
Une u heh nongïalam jong ka seng Congress u la pynshisha da kaba ong ba ka jingshah khot hajir jong u ka la long ha kine ki khyndiat sngi ba la leit, hynrei u la ïoh jingtip halor jong ka dang ha ka Lah Sngi U Blei. “Namar kata um lah ban leit mih hakhmat ka kynhun ha ka por ba dei,” u la ong.
“Ka jingkhot hajir ka la long ha ka 3 tarik, Risaw da u Assistant Director u Amit Kumar, ha kaba la ong ba u Meghachandra u la dei ban leit mih markhmat ha ka 7 tarik, Risaw na ka bynta ban shim ka jingtohkit bad ban pynbiang ïa ki sabut bad ki sakhi halor ka jingjia. Ka shithi ka la ong ba lada ym lah ban leh kumba la hukum, yn sa shah pynngat ha ki kyndon hapoh ka PMLA.
