Jowai, Risaw 10
Ka Mukhla Evergreen bad Khliehïongriang ki la ïasam mar shi point, katba ka Chutwakhu ka la ïoh jingjop ha ka 1st Division Football Tournament (12th Chatister Kharkongor Memorial Trophy 2024) ba la pynïaid da ka West Jaiñtia Hills District Sports Asociation (WJDSA) ha Kiang Nangbah Stadium, Jowai.
Ha kane ka jingïakhun kaba la long ha ka Sngi Palei, ka Mukhla Evergreen bad ka Khliehïongriang ki la ïakhaid mar 2-2 kol. Ïa ki kol na ka Khliehïongriang la thep da u Arwanki Dkhar ha ka minit kaba 19 bad Basuklang Khonglah (86). Katba na ka Mukhla Evergreen la thep da u Ïaiskhemlang Nongsiej (62) bad u Wompher Phawa (83).
Ha ka jingïalehkai kaba bud, ka Chutwakhu ka la jop da 2-1 kol ïa ka Sabahmuswang 1. Ïa ki kol jong ka Chutwakhu la thep da u Luckyness Khyriem ha ka minit 7 bad Sawi o Tariang (49). Katba ka Sabahmuswang ka la lah ban pynphai kylla shi kol lyngba u Kerlang Shylla (55) ha shwa ba kan mad ïa ka jingshah rem.
Ka jingïalehkai ha ka 12 tarik kan long hapdeng ka Khimusniang pyrshah ïa ka Sohmynting ha ka por 12 baje mynsngi, katba ka Dulong ïa ka Nangbah Ïawmusiang ha ka por 2:30 janmiet.
