Shillong, Risaw 10
Ka Meghalaya Football Associociation (MFA) ha ka Sngi Palei ka la pyllait ïa ka prokram ïalehkai jong ka Meghalaya State League 2024 ka ban sdang naduh 26 tarik mynta u bnai Risaw. Ka lahduh jong ka MSL 2019, ka Shillong Lajong FC kan pynkhreh ïa ka jingïakhun kaba nyngkong pyrshah ïa ka 7Wasa United FC ha Wahïajer, West Jaiñtia Hills.
Ïa kane ka lympung la phiah ha ki hynriew tylli ki group bad yn pynïalehkai ha la ki jong ki zone. Ki kynhun kiba don ha ka Group-A ki long ka Chipakkopre FC, Atong Matgrik FC, Pingera Do-Gisik FC bad ka Lumsohkhlur S&CC ha kaba yn pynïalehkai ha Tura. Ha ka Group-B ka ban pynïalehkai ha Mawkyrwat ki long ka Mawten SC, Khliehmawlieh Youth Club, Riangdo Youth S&CA bad ka Sutnga SS&CC.
Ha ka Group-C ki ban pynïa-lehkai ha Tyrsad ki long ka Mawlum Tyrsad SC, Seven United SS&CC, Nangkiew Shaphrang Lumdieng-ngan SC bad ka Ladthadlaboh SC. Ha ka Group-D ki ban pynïalehkai ha Khliehriat ki kynthup ïa ka lahduh jong ka MSL 2023, ka Rang-dajied United FC, kumjuh ka Rym-bai Skhenshynriah SC, Ïatylilang Lumsehkot FC bad ka Mulait United FC.
Ha ka Group-E ki ban pynïaleh -kai ha Wahïajer ki long ka 7 Wasa Utd FC, Shillong Lajong FC, Seinbhalang Shkentalang FC bad ka Mawtari Myrdon SC. Katba ha ka Group-F ki ban ïakhun ha Shillong ki long ka lahduh jong ka Shillong Premier League 2023 ka Mawlai SC, kumjuh ka Seng Samla Mawmluh, Pynursla United YC bad ka Patharkhmah SC.
Haba ïadei bad ki jingïakhun quarter final, semi final bad final ka MFA kan sa pynbna kham hadien ïa ki tarik ban ïalehkai.
Ki jingïalehkai ban long ha ka 28 tarik ha ka Group-A kin long hapdeng ka Chipakkopre FC bad ka Atong Matgrik FC, ha ka Group-B kan long hapeng ka Mawten bad ka Khliehmawlieh, ha ka Group-C kan long hapeng ka Mawlum Tyrsad SC bad Ladthadlaboh SC, ha ka Group-D kan long hapeng ka Rangdajied United FC bad ka Rymbai Skhenshynriah SC, ha ka Group-E kan long hapeng ka Seinbhalang Shkentalang FC bad ka Mawtari Myrdon SC bad ha ka Group-F kan long hapeng ka Mawlai SC bad ka Seng Samla Mawmluh. Baroh kine ki jingïalehkai kin long ha ka por 2 baje janmiet.
