Mawkyrwat, Risaw 11
Ka Nonglang Sports Club ka la sdang ïa ka Golden Jubilee Celebration Football Tournament 2024 ha ka Sngi Thohdienfg ha madan Pyndenïewlyngdoh, Nonglang kaba ha South West Khasi Hills. Kane ka lympung ka long shi bynta ïa ka jing-rakhe lehkmen ïa ka jingdap 50 snem jong kane ka klob.
Ha kane ka sngi sdang ïa kane ka lympung, ka Pynnoh Riwar SC ka la ïoh jingjop hadien ba la lah ban pynliem noh ïa ka Marskuiñ SC da 2-0 kol.
Ïa kine ki kol la thep da u Teiborlang Ryntathiang ha ka minit kaba 20 bad u la ïoh ruh ïa ka nam kum u ‘rangïalehkai ba tbit bad ïa ka kol ba ar la ïoh ban thep da u Manbhakupar Ïawphniaw ha ka minit kaba 63.
Ïa kane ka lympung la wan ban plie da u Bah A.L Bareh (MCS), Assistant Commissioner jong ka South West Khasi Hills District ha ryngkat u Bah Kynpham V. Kharlyngdoh kum u symbud kongsan bad kiwei kiwei.
Ha kane ka lympung ki don baroh 16 tylli ki kynhun jong ka thaiñ bad na kiwei distrik ruh kiba wan ban ïashim bynta. Ka khusnam ha kane ka lympung ka long T. 2 lak tyngka ha kaba ka kynhun kaba rah nam lahduh kan ïoh T. 1,30,000 ryngkat ki trophy bad kaba wan ba-ar kan ïoh T.70,000 tyngka.
Na ka liang ka Nonglang Sports Club ka la pyntip ruh ba ka jingïalehkai kaba ar jong kane ka lympung kan long hapdeng ka Thongni Brothers pyrshah ïa ka Ïawpaw FC ha ka 19 tarik ha ka por 2 baje noh phai sngi ha madan Pyndenïewlyngdoh, South West Khasi Hills District.
