Imphal, Risaw:
Ha ka jingpyntreikam kaba khlem shongthait jong ki shipai ka tnat Indian Army, ki Assam Rifles, ki pulit jong ka Manipur, bad kiwei kiwei ki bor pahara, ki la ïoh kurup haduh 26 tylli ki tiar siat, ki kuli ïasiat, bad ki jaka buh tiar thma ha ka taïew ba la lah.
Ha ka 7 tarik, Risaw, ha Bishnupur distrik, ki shipai ka tnat Indian Army bad ki pulit ka Manipur ki la pynlong ïa ka jingleit khynra lang ha ka thaiñ Gelbung.
Ha kane ka jingpyntreikam, ki shipai ki la ïoh ban kurup ïa ka 9mm Carbine Machine Gun, ka suloi AK-47, ka suloi 12 ktang, ka pistol kaba 12 ktang, 2.5 kilo u dom Improvised Explosive Device (IED), ki kuli ïasiat, ki bom kawang kti, bad kiwei kiwei ki tiar ba la buh ha ka jaka buh tiar thma.
Kawei pat ka jingkhynra ha katei kajuh ka sngi ha Kangvai, Churachandpur distrik, ka la pynlong ban ïoh kurup ïa ar tylli ki Mortar ba la shna hi, ar tylli ki pistol, ki bom kawang kti bad kiba bun kiwei pat ki tiar pynbthei.
Ha ka sngi kaba bud kata ha ka 8 tarik, Risaw, ki shipai ka tnat Assam Rifles bad ki pulit ka Manipur ki la pynlong ïa ka jingkhynra ha ka thaiñ Khelakhong kaba don ha Imphal West.
Ki shipai ki la ïoh ban kurup ïa ka suloi 7.62 mm Self-loading Rifle (SLR), ka suloi .303, ka pistol 9mm, ki bom kawang kti, bad kiwei kiwei ki tiar siat bad pynbthei ha ka por ba la pynlong ïa ka jingleit khynra ha ka thaiñ.
Ha ka 9 tarik, Risaw, ka kynhun ba la ïatreilang hapdeng ki shipai ka tnat Assam Rifles bad ki pulit ka Manipur ha ka thaiñ Champai jong ka Sagolmang, ha Imphal East, ka la pynlong ïa ki ban ïoh ban kurup ïa kawei ka suloi M16, ar tylli ki SLR, kawei ka suloi .22, kawei ka suloi Sten ba la shna hi, ar tylli ki Carbine, 8 tylli ki pistol 9mm ba la shna hi, ki kuli ïasiat bad ki bom kawang kti.
Ki shipai ka tnat India Army ki la pynpaw ïa ka jingdonkam jong ka jingïatreilang ha kaba ïadei bad kane ka kam, ha kaba u nongaiktien u la kdew ba ka “jingïatreilang kaba khlem jingeh hapdeng ki shipai India, ki Assam Rifles, bad ki bor pynjari aiñ ha ka thaiñ ka la long kaba kongsan ha kaba la pynthikna ïa ka jingshngaiñ jong ka thaiñ.”
U nongaiktien u la bynrap shuh shuh da kaba ong ba ki shipai ki dang ïai bteng ban pynneh ïa ka jingsuk bad ka shongsuk-shongsaiñ ha Manipur lyngba ka jingïatreilang kaba ïaibteng bad ki shipai ka thaiñ.
