Los Angeles, Risaw:
Ki nongap pahara ba la buh kyrpang ban ïada ia ka jaka ialap ilekshon u Trump, ki la ioh kem noh ia uwei u briew uba rah ia ka suloi ‘Shotgun’ bad kawei ka suloi kaba la dep pynbiang kuli lypa na ka jaka ialap ilekshon jong u Donald Trump ha Coachella jong ka nongbah California.
La ong ba ka tnat ‘Secret Service’ ka la ioh ban tehlakam noh ia ka jingthmu ba buhrieh jong utei u briew, khlem da buh jingma ia ki paidbah ne ia u Trump uba don ha katei ka jaka ha ka Sngi Saitjaiñ katba u dang ai jingkren sha ki paidbah na ka bynta ka ilekshon President ka ban long shen mynta u Naiwieng.
Ia mynta hi, la ong ba kam shym don shuh kano- kano ka jingma ia u Trump wat hadien ba u la mih na katei ka jaka ha katei ka sngi bad ki tnat syntiat kin dang bud-dien bad wad bniah pat ioh utei u briew u dei uba don jingiadei bad kino-kino ki kynhun kiba lah ban buh jingma ia ka jingim jong utei u nong-ialam hadien-habud.
