Guwahati, Risaw:
Ki shipai pahara ki la kem ïa hynñiew ngut ki dkhot jong ka kynhun lehnoh ba la shah ñiew beaiñ ha Manipur Imphal West distrik ha ka Lah Sngi U Blei, la ïathuh ki pulit. Ha ka jingïakren bad ki nongthoh khubor, u SP u Ksh Shivakanta Singh u la ong, “Da kaba pynshong nongrim halor ka jingïoh jingtip ha kaba ïadei bad ka jingdon jong ki lehnoh ka kynhun Kangleipak Communist Party (Nongdrenkhomba) ha ka shnong Langol Game, ki bor pahara ki la pynlong ïa ka jingkhynra bad ki la ïoh ban kem ïa kine ki hynñiew ngut ki dkhot jong ka seng kynthup ïa kawei ka longkmie.”
Kine kiba la shah kem ki dei kiba la tip kyrteng kum u L. Alin (26 snem), K. Rohit Singh (23 snem), Sanju W. (20 snem), P. Thoiba (26 snem), W. Hero (21 snem), Y. Bikash (23 snem), bad u Henthoibi . M. (41).
Ha ka jingleit khynra, ki shipai ki la ïoh ban kurup ar tylli ki kali saw shaka, kawei ka kali ar shaka, ar tylli ki pistol bad ki jaiñ Camouflage, la ong u Singh.
“Kumba ki kam dawa pisa ki nang kiew, ki paidbah nongshong shnong ki la sdang ban pynpaw ïa ka jingbym sngewtynnad jong ki. Ki pulit ki dang buddien bha halor ki jinglong jingman. Ki la don ki khep ba ju shah leh donbor ha kaba ki riewpaidbah kim ju ai jingtip,” la batai u Singh.
“Ha kine ki saw ne san sngi ba la leit ki la don kumba 11 ngut ki briew ki la shah kem ha ki pulit ka Imphal West distrik ha kaba ïadei bad ki kam dawa pisa. Ngin sa sdang ban pyntreikam ïa ka National Security Act (NSA) na ka bynta ban ai jingshngaiñ ïa ki paidbah,” u la maham. “Ngin sdang ruh ban ai jingmut ban ai ïa ki mukotduma sha ka National Investigation Agency (NIA),” la ong u Singh bad kyntu ïa ki paidbah ban wan shakhmat na ka bynta ban ai jingtip ei ei sha ki pulit khnang ban lah ban pynduh pyndam ha kaba ïadei bad ki kam dawa pisa.
La ong ba ka jingïatreilang jong ki nongshong shnong kan sa ïarap ïa ki pulit ban ïaid shakhmat ha kaba ïadei bad ki jingpyntreikam ba bun khamtam ban leit thwet ïa ki runar kiba la donkti kum ha kine ki kam beaiñ.
