Shillong, Risaw 16
Ka Sawmer SC ka la ïoh jingjop ha kaba sdang ïa ka lympung ïalehkai Shillong Premier League 2024, hadien ba ka la lah ban pynliem noh ïa ka Nangkiew Irat SC da 3-2 kol ha ka sngi Balang ha SSA Stadium kaba ha First Ground, Polo.
Ha kane ka jingïakhun ka Sawmer ka la lah ban ïalehkai bha naduh kaba sdang namar ka la ïoh ban pynkhih jar nyngkong eh lyngba u Diego Khyriem ha ka minit kaba 6 na ka daw ka jingtlot ki rangïalehkai ka Nangkiew ha ka bynta shadien.
Hadien katto-katne por ba la bteng ïa ka jingïakhun jong ka kylla miet ka Sawmer ka la ïai bteng ban ïakhun tyngeh bad dei ha ka minit kaba 49 ba ka la thep biang ïa ka kol kaba ar lyngba u Hilford Lyngkhoi. Kane ka kynhun ka la pynbud biang ïa ka kol kaba lai lyngba u Orestar Sad ha ka minit kaba 56 na ka daw ka jingbym lah ban ïalehkai bha da u rangapkol.
Hadien katto-katne por ka Nangkiew ka la pyrshang ban ïakhun tyngeh ha kaba u Wallamsuk Nongkhlaw u la ïoh ïa ka kabu kaba biang, hynrei na ka daw ka jingbakla uwei na ki rangïalehkai shadien ka Sawmer ha kaba ka bol ka la leit sha kyndong (corner) bad dei hangne ba u Isak Vanlalpeka u la ïoh ïa ka kabu kaba biang ban pynphai kylla shi kol ha ka minit kaba 70.
Kane ka shi kol ka la nangpynïoh mynsiem ïa ki rangïalehkai ka Nangkiew Irat ban ïakhun tyngeh shuh shuh bad hadien phra minit ka la thep biang sa shi kol lyngba u Wanpynshngaiñ Nongstieng.
Katei ka jinglah ban pynphai da ka Nangkiew Irap ka la pynkyndit bynriew ïa ki rangïalehkai ka Sawmer ban ïakhun tyngeh. Watla ka la ïoh ïa ki kabu kiba biang, hynrei kam shym la lah ban pynurlong na ka daw ka jingïashan tyngeh ki rangïalehkai ‘dien ka liang pyrshah.
Ha kawei pat ka jingïakhun kaba la long kham hashwa ka Nongrim Hills SC ka la jop da ka walk over kaba long da 3-0 kol, hadien ba ka Laitkor SC kam shym la wan mih sha madan na ka daw ba kam pat shym la lah ban pyndep ia ka Centralised Registration System (CRS) hashwa ïa ka por ba la pyntreikam da ka All India Football Federation (AIFF).
Kane ka lympung kan bteng biang ha ka sngi Palei ha kaba ka Nongthymmai SC kan ïakhun pyrshah ïa ka Ryntih FC ha ka por 11:50 mynsngi, katba ka Langsning FC ïa ka Shillong Lajong FC ha ka por 2:45 janmiet.
