Jerusalem, Risaw:
U Myntri Rangbahduh ka Israel, u Benjamin Netanyahu ha ka jingiakren bad u President ka France- u Emmanuel Macron ha ka Sngi Ba-ar, u la ong ba ka Israel kan ym treh ban iakren iasuk ne ban sangeh iasiat bad ka Hezbollah, lada ka Hezbollah ka dang ioh lad hi ban nang pynkharoi ia ki kam thombor jong ka kumba ka long mynta.
Namar la ong ba na ka liang jong ka France, utei u nongialam ka Frace u la kyntu ia ka Israel bad ki lehnoh Hezbollah jong ka ri Lebanon ba ki dei ban sangeh noh ia ka jingiakynad namar kan long ka jingma kaba khraw ia ki ri ha ka thaiñ Middle East baroh kawei. Ha kajuh ruh ka por, ka France ka la kyntu ia ki ri lehnoh ba kin ym ai jingkyrshan ne phah tiar ïakhun sha ki Hamas lane sha ki Hezbollah, khnang ba ka jingiakynad jong ki bad ka Israel kan kut noh.
Kumta, utei u nong-ialam ba ha khlieh duh jong ka Israel, u la ai jubab sha utei u nong-ialam jong ka France, ba ka Israel kam lah da lei-lei ban pdiang ia ka jing-iakren iasuk ne ban sangeh thma, katba ka Hezbollah ka dang buh jingma ia ka shongsuk- shongsain ha Lebanon kaba lah ruh ban pynkylla biang ia katei ka ri sha ka jinglong barim.
Ha kajuh ruh ka por, u Netanyahu u la ong ba ka jingleit thombor jong ka Israel ia ki lehnoh Hezbollah, ka long ban tehlakam ia ki jingma kiba ap ia ki paidbah nongshong shnong ka Israel namar ka jingdon jong kitei ki lehnoh bad ka jing ailad jong ka Lebanon ia kitei ki lehnoh kiba don hapoh u pud- u sam jong ka, ba kin pynroi ia ki kam thombor jongki na ka por- sha ka por.
