Moscow, Nailar:
Ka Embassy jong ka Russia kaba dei khmih hapoh Rome, ha ka Sngi Nyngkong ka la kynnoh ïa ka Ukraine halor ka jingbthei kaba la pynïap briew ha ka sngi kut taiew ha kawei ka jakabam hapoh ka nongbah Moscow, da kaba batai ïa kane kum ka jingpyrshang ban pyntieng pynsmiej ïa ki nong Italy kiba don ha Russia.
Ka tnat embassy ka la iathuh ba “ki lehnoh jong ka Ukraine” ki kwah ban “pyntieng pynsyier ïa ki paidbah nongshong shnong jong ka Italy kiba trei ha Russia bad ban pyni ïa ki, ba ma ki ruh ki don ha ka jingeh bad ki lah ban long ki nongshah pynïap hadien jong ki nongleh kam sniew.”
Ka la ong ba ka jingshah thombor ha ka miet jong ka Sngi Saitjaiñ ha ka jaka bam Balzi Rossi, ka la pyniap ïa san ngut bad pynmynsaw ïa 19 ngut, da kaba bynrap ba u nongshet jingshet jong ka na Italy bad ki nongtrei jong u kim shym la mynsaw tang namar ka jingpeitngor bad ka jingaiti lut ialade jong u nongap pahara na Russia ha ka kamram jong u.” Haba iadei bad kane, la ong ba kam shym don kano- kano ka jingkynthoh ne jingpynphai ktien na ka liang jong ka Ukraine.
Ka National Anti-Terrorism Committee kaba pynïasoh ïa ki tnat pahara bapher bapher, ha kaba sdang ka la pyntip ïa ka jingïap kaba kham duna ha ka kyrwoh kaba la pynmih tang hadien ba la jia katei ka jingshah thombor. Ka la ong ba katei ka jingbthei bom, ka la pyniap ïa lai ngut ki briew, kynthup ïa kawei ka kynthei, kaba rah ïa utei u tiar pynbthei shapoh katei ka jaka bam, uwei u nongap, uba la pynsangeh ïa ka, bad uwei u nongwan, uba don hapoh katei ka jaka bam. Ka la iathuh ba 21 ngut kiwei pat ki la mynsaw haba utei u bom u la bthei hajan ka jingkhang jong katei ka restaurant.
Ka komiti kam shym la iathuh mano ba shah thombor ne jer kyrteng ïa u nongshna ïa katei ka jingjia.
U Mayor jong ka Moscow, u Sergei Sobyanin, ha ka sngi U Blei, u la batai ïa katei ka jingbthei bom kum ka “kam lehnoh kaba shyrkhei,” hynrei um shym la ong mano ba donkti ha katei ka jingbthei bom ha katei ka jaka bam ba heh, kaba don ha ka mala ba shapoh jong kawei ka ïing kaba heh bha, kaba dei kawei na ki hynriew tylli ki ïing heh ha ka nongbah jong ka Soviet, kiba la tei ha ka snem 1900.
Ka tnat kam bar ri jong ka Russia ka la pynmih biang ïa ka jingpynbna jong ka embassy khlem da kren eiei. Kam shym la jubab ïa ka jingkyrpad ban ai jingmut ne batai ïa ka jingbun kiba iap.
Katto katne ki lad pathai khubor jong ka Russia, ki la kam ba katei ka jingbthei bom, ka dei kaba la thmu ïa u shipai shipai jong ka Russia, uba dang rakhe ïa ka sngi kha jongu ha katei ka jaka bam. Don kiba kam ba uta u heh shipai u dei u Col.-Gen. U Alexander Chaiko, uba la ïalam ïa ki shipai kiba la leh ïa ka jingpyrshang ba la pulom ban hiar thma ïa ka nongbah jong ka Ukraine ha u snem 2022 bad dang shen la thung ïa u kum u heh duh jong ki shipai suiñbneng jong ka Russia. Ia ki jingkynnoh ym shym la lah ban pynshisha da kaba laitluid.
Ka kot khubor jong ka kam khaii, ka Kommersant, ka iathuh ba ïa katei ka bom, kaba la buhrieh ha ka synduk jingai sngewbha, ka lah ban long ba la pynbthei na jngai bad ka kynthei kaba rah ïa u, ka lah ban nym tip ïa utei u bom. Ka Kommersant ka iathuh ba utei u bom u don kumba 1 kilo (2.2 pound) ki tiar pynbthei bad u don ruh ki bol nar na ka bynta ban pyniap briew.
Ki bor synshar jong ka Russia ki la kynnoh ïa ka Kyiv na ka bynta ka jingbthei bom bad kiwei kiwei ki jingshah thombor pyrshah ïa ki heh shipai hadien ba ka Moscow ka la phah ïa ki shipai sha Ukraine ha u bnai February 2022. Ha kaba sdang jong une u snem, ka tnat pahara jong ka Russia ka la ong ba ki bor synshar kin pynkhlaiñ bha ïa ka jingpahara ha kylleng ki jaka kiba bud ïa ki heh shipai bad ki heh sorkar.
Ha u bnai February, u Lt. Gen. Vladimir Alexeyev, uba dei u deputy heh jong ka tnat wad bniah jong ki shipai jong ka GRU, ula shah siat lai sien ha kawei ka iing sah jong ka Moscow, hynrei ula lait im. Ka Ukraine ka la kyntait ïa ka jingdonkti jong ka.
