Shillong, Risaw 16
19 ngut ki nongïakhun kti ba pawkhmat ka Jylla kiba kynthup ïa 9 ngut ki nongïalehkai na ka kyrdan para hapoh ka lama jong ka Meghalaya Arm Wrestling Association (MAWA) kin mihkhmat ïa ka kynhun ïalehkai ka ri India sha ka Asian International Cup ka ban long ha Mumbai naduh 19 haduh 26 tarik mynta u bnai.
Ka jingshah jied kine ki nongïalehkai ka dei lyngba ka jingtrei shitom, ka jingaiti lut, bad ka jingïai shah. Napdeng ki nongïalehkai ba la shah jied ki dei kiba la nangkiew shaphrang ha ka kam ïalehkai bad kaba pyni ïa ka jingpaw ka sap ïalehkai ha ka arm wrestling hapoh ka Jylla.
Nalor ki nongïalehkai, ka MAWA ka la thung ïa u Bah Aiboklang Paul Wanñiang kum u kapten jong ka kynhun, ha kaba la kyrshan lang da ka Kong Margaret Pathaw kum ka co-captain. Ka jingïalam jong ki kan long ka atiar ban ïalam ïa ka kynhun ha baroh kawei ka jingïalehkai.
Ka MAWA ka la jied ïa u Bah Terence Jones Lyngskor bad ka Kong Sumita Kshiar kum ki nongmihkhmat ba thikna na ka bynta ka kynhun. Ka jingshemphang bad jingtbit jong ki kan don ka bynta kaba kongsan ban pynthikna ba ki nongïalehkai kin long kiba la pynkhreh bha na ka bynta ki jingeh ki ban sa wan.
Kane ka kynhun ka dei ban leit sha Mumbai ha ka 18 tarik mynta u bnai bad na ka liang ka synjuk ka la kyntu ïa ki paidbah riew ieit ïa kane ka jingïalehkai ba kin ai jingkyrshan ïa ki nongïalehkai ha ki jingduwai jong ki khnang ba kin lah ban ïalehkai bha ha katei ka jingïakop.
Katei ka rynsan ïalehkai Asian International Cup ka plie lad ban pyni ïa ki sap jong ki ba kin long kiba paw ha ka pyrthei.
Na ka liang ka MAWA lyngba u Information Secretary u Bah Hubert Lyngdoh Nonglait, ka pynpaw ka jingsngewnguh kaba khraw ïa u Myntri Rangbah ka Jylla u Conrad K. Sangma, kumjuh ïa u Myntri ka tnat ïalehkai u Bah Shakliar Warjri kiba la aiti lut nalor ka tnat ïalehkai bad ka Meghalaya State Olympic Association ha ka jingïalam jong u Bah John F. Kharshiing na ka bynta ki jingkyrshan.
