New Delhi, Risaw:
Ha ryngkat ki tarik ban pynlong ïa ka ilekshon Assembly ha Jharkhand bad Maharashtra, ka Election Commission ha ka Sngi Ba-ar ka la pynbna ïa ki tarik ban pynlong ïa ka ilekshon shiteng samoi na ka bynta ar tylli ki Lok Sabbha konstitwensi, kaba kynthup ïa ka Wayanad ha Kerala bad ka Nanded ha Uttarakhand bad kumjuh ruh ha ki 48 tylli ki Assembly konstitwensi.
Ka ilekshon shiteng samoi na ka bynta ka Wayanad Parliamentary konstitwensi ha Kerala, ka la sah thylli na ka jingpyllait jong u Rahul Gandhi, u nongïalam jong ka seng Congress, uba la jied ban bat ïa ka Rae Bareli konstitwensi ha Uttar Pradesh bad 47 tylli ki Assembly konstitwensi kin long ha ka 13 tarik, Naiwieng, kaba dei lang ha kajuh ka sngi ban pynlong ïa ka bynta banyngkong jong ka ilekshon Assembly na ka bynta ka Jharkhand.
Katba, ka ilekshon shiteng samoi na ka bynta ka Nanded Lok Sabha konstiwensi ha Maharashtra, ka la sah thylli hadien ka jingkhlad noh jong u MP ka Congress, u Vasant Chavan, bad ka Kedarnath Assembly konstitwensi, kan long ha ka 20 tarik, Naiwieng, ha ryngkat ka ilekshon Assembly jong ka Maharashtra bad ka bynta kaba ar jong ka ilekshon ha Jharkhand.
Ha kajuh ka por, ïa ka ilekshon shiteng samoi na ka bynta ka Basirhat Lok Sabha konstitwensi ha West Bengal bad ka Milkipur Assembly konstitwensi ha Uttar Pradesh ym shym la pynbna satia namar ba dang sahteng ka jingmudui ha kaba ïadei bad ka ilekshon hapoh ïingbishar kaba la long pyrshah ïa ki nongjop kiba hashwa.
Ka jingñiew vote na ka bynta baroh ki Assembly konstitwensi kan long ha ka 23 tarik, Naiwieng. Ki 48 tylli ki Assembly konstitwensi bad ar tylli ki Lok Sabha seat na ka bynta ka ilekshon shiteng samoi kin long ha kylleng ki 15 tylli ki jylla, kiba kynthup ïa ka Uttar Pradesh, Assam, Bihar, Chhattisgarh, Gujarat, Karnataka, Uttarakhand, Maharashtra, Madhya Pradesh, Meghalaya, Kerala, Punjab, Punjab bad ka Sikkim.
