Shillong, Risaw 17
Ka jingangnud ka synjuk ïalehkai jong ka Meghalaya Football Association (MFA) ban sei da ki ‘rang ïalehkai kiba kynsai na ka Meghalaya State League jong u snem 2024 ki ban mihkmat sha ka National Football Championship (Santosh Trophy 2024-25) ka la pulom noh namar kine ki lympung ki lah ban ïatyngkhuh lang.
Ïa ka MSL 2024 la thmu ban sdang ha kaba kut jong u Risaw mynta u snem, katba ïa ka wat ba nyngkong (group stage) jong ka Santosh Trophy la thmu ban sdang ha u Naiwieng mynta u snem.
Ka jingbym lah ïalehkai bha ka kynhun ïalehkai ka Jylla ha ka Santosh Trophy ba la dep ka la pynlong ïa ka MFA dangshen ban shim ïa ka rai na ka bynta ban jied noh da ki ‘rang ïalehkai kiba kynsai na ka Meghalaya State League 2024 ki ban mihkhmat ïa ka kynhun ïalehkai ka Jylla sha katei ka lympung.
Ha kane ka jingïalehkai (group) ka Meghalaya ka la don ha ka Group-D ka ban kynthup lang ïa ka Assam, Sikkim bad Tripura. Katba kiwei pat saw tylli ki jylla jong ka thaiñ shatei lammihngi (Arunachal Pradesh, Manipur, Mizoram bad Nagaland) ki la don ha ka Group-E.
Ki jingïalehkai (group) kin sdang ha u Naiwieng bad ka wat khatduh kan long ha u Nohprah mynta u snem. Ki kynhun kiba jop ha ki khyndai tylli ki group ryngkat ar tylli kiba poi sha ka phainal ha u snem 2023-24 (Services bad Goa) kin ïakhun ha ka wat kaba khatduh, ryngkat bad ka Telangana kaba pynlong ïa kane ka lympung.
