Imphal, Risaw:
Ki la don kumba 19 ngut ki MLA jong ka BJP ha Manipur kiba la phah da ka shithi sha u Myntri Rangbahduh u Narendra Modi ban dawa weng noh ïa u Myntri Rangbah ka jylla u N Biren Singh. Napdeng kine ki MLA kito kiba la soi ha ka shithi dawa ki kynthup ïa u Lamphang ka ïingdorbar thawaiñ u Thokchom Satyavrat Singh, u Myntri u Thongam Vishwajit Singh bad u Yumnam Khemchand Singh.
Kane ka shithi ka long hadien ka jingïalang kaba la long ha Delhi ha kane ka sngi Ba-ar, ha kaba la lumlang ïa ki MLA ka Meitei, Kuki, bad Naga. Katkum ki tyllong khubor ba la ïohlum, la ïathuh ba ki la don kumba san ngut ki MLA jong ka seng na ka liang synshar kiba la aiti ïa katei ka shithi sha u Myntri Rangbahduh ha ka sngi Balang.
Ha ka shithi ba la phah, ki MLA ki la pynpaw ïa ka jingsngewkhia ba ki paidbah ka Manipur ki buh jingkylli halor ka jinglah jong ka sorkar ba la lamkhmat da ka BJP ban wanrah biang ïa ka shongsuk-shongsaiñ, kumjuh ruh ban pynsting ïa ki jingïakynduh jingeh jong ki nongshong shnong.
Ki la kdew shai da kaba ong ba ki nongshong shnong ki la kyntu ïa ki nongmihkhmat jong ki ba kin hiar shuki lada jia ba ym lah ban weng kloi ïa ki jingeh.
“Ngi kum ki nongkyrshan ba radbah jong ka BJP bad hadien ba ngi la ïoh ïa ka jingbthah na ki paidbah, ngi sngew don ka jingkitkhlieh ban pyllait im ïa ka Manipur katba ngi dang ïada ruh ïa ka BJP na ka jinghiar ha ka jylla,” la ong ka shithi.
Ki MLA ki la ban jur da kaba ong ba haba kheiñ ïa ka jingïakynad bad ki jingïaleh kiba dang ïaid shakhmat hapdeng kine ki ar jaitbynriew, ka jingweng ïa u Myntri Rangbah ba mynta jong ka jylla kan long ka lad kaba hakhmat eh ban lah ban weng ïa ki jingeh.
Ka shithi ka la banjur shuh shuh da kaba ong ba tang da kaba buh ïa ki bor pahara kan ym lah ban pynbeit ïa ki jingeh kiba don mynta.
Ka la maham ba ka jingpynneh slem ïa ki jingïakynad khlem artatien kan wanrah ïa ka jingjulor kaba ym lah ban pynbha bad kan pynsah budnam sniew ïa ka India kum ka ri.
Ki MLA ki la kyrshan ïa ka jingïakren bad ka jingïatreilang kaba don jingmut ban kyntiew ha ka ban wanrah ïa ka jingpynïasuk bad ka jingsuk.
Ki la kyntu ban bishar bniah ïa kiei kiei kiba kongsan kiba khanglad ïa ka jingïakren bad ki la dawa ba la dei ban leh ei ei halor ka jinglong jingman na ka bynta ka jingïakren.
“Ha ka jingpynshai halor kine ki jingshisha, ngi kyrpad jur ban sdang noh kham kloi ïa ka jingïakren ïasuk bad baroh ki bor ba dei khmih khnang ban ïada ïa ka Manipur hashwa ban dier ka por,” la ong ka shithi.
