Washington, Risaw:
U President barim ka US, u Donald Trump, haba iakren bad ki nongthong khubor ha ki khyndiat sngi ba la leit, u la kynnoh ia u President ka Ukraine u Volodymyr Zelensky ba dei ma u uba pynheh ia ka thma bad ka Russia. Kane ka jingiakren ka pyni ba ka United States ka lah ban ym ai jingkyrshan shuh ia ka Ukraine lada u Trump un jop biang ia ka shuki President ha kane ka ilekshon ka ban wan.
Kumta, la ong ba utei u nongialam ka Republican u ju kynthoh man ka por ia u nongialam ka Ukraine ba dei ma u, uba kwah ban pynheh ia ka thma bad ka Russia bad u Trump u la kynthoh jur ruh ia ka jing-ap jong ka Ukraine ia ki lad jingïarap bad ki song jingïarap sha ka tnat shipai jongka na ka US naduh ba sdang jong ka thma ha u snem 2022.
U Trump u la kynnoh ruh ba utei u nongialam ka Ukraine um kwah ban wanrah ia ka shongsuk-shongsaiñ ha ka pyrthei bad dei kane ka daw ba ka Ukraine bad ka Russia kim lah shuh ban poi sha ka jingiasuk wat haduh kine ki sngi.
Pynban ha kawei ka liang u Trump u la pynshai pat ba kane ka jingkren jong u kam mut ba um kwah ban iarap ia ka Ukraine, hynrei ka long namar ba u sngewkhia halor ka jingiap bad jingduh ei ia ki mynsiem briew ba lui-lui bad ba u President ka Ukraine um shym la dei ban pynbna thma pyrshah ia ka Russia.
Namar la ong ruh ba u Zelensky u la pyni ha u Trump ha ka jingialang ba la long ha New York ha u Nailur ba la leit haba iadei bad ki jingthmu jong ka Ukraine ban ioh ban pynkut noh ia ka thma bad ka Russia.
Katba na ka liang jong ka Vice- President ka US- ka Kamala Harris, ka la kular ba ka US kan iai kyrshan ia ka Ukraine katba ka Russia kam pat sangeh ia ka jingleit thombor sha Ukraine wat haduh lashai hadien lada ka jop ia ka ilekshon President kaba kan hap ban ïakhun pyrshah ia utei u nongialam barim ka US- u Donald Trump.
