Berlin, Jylliew:
Katkum ki khubor, la ong ba ka France ka la sakhi kumba 1,000 ngut kiba la ïap ha ka taiew ba la dep ha ka por ba jur bha ka jingshit bad jingkhluit jong ka suiñbneng, la ong ka tnat ka koit- ka khiah jong ka ri ha ka Sngi U Blei, namar ka jingshit palat jong ka sngi kaba la wanrah ia ki jingpluh khlaw ha Germany bad ki pulit jong ka Berlin ki la pyndonkam da ki pipe synreit um ban pyn pyngngad ïa ki paidbah.
Ki rekod jong ka jingshit jingkhriat ki la hap noh ha ki katto katne ki ri ha ka sngi kut taiew katba ka jingshit jingkhriat ka la nang kiew suki suki sha ki bynta ba shatei jong ka dewbah.
Ha Germany, ka jingshit jingkhriat kaba thymmai ha ka por miet, ka la ïoh jingtip ha ka Sngi U Blei ha Kubschutz, kaba don ha ka thaiñ mihngi jong ka Saxony, ha kaba ka jingshit jingkhriat ka long 29.4 degree Celsius (84.9 Fahrenheit). Ka la wan tang katto katne kynta hadien ka jingshit kaba 41.5 degree Celsius (106.7 degree Fahrenheit) ha ka por sngi ha Mockern-Drewitz ha Saxony-Anhalt, katkum ka jingtip ba nyngkong jong ka German Weather Service DWD. Ia ka rekod kaba mynshuwa la buh shisngi kham mynshuwa.
Ka jingwad bniah kaba thymmai na ka World Weather Attribution, kaba dei ka jingiatreilang jong ki stad saïan kiba don ha Europe, ka la iathuh ha ka Sngi Thohdieng ba ka jingshit bad ka jingkhriat kaba la pynkheiñ ia ka rekod ha Europe ha kane ka taiew ba la dep, kan ym lah ban long khlem ka jingkylla ka suiñbneng.
Ka France, ka la pynpaw ïa ka jingkiew jong kiba ïap ha ka taiew ba la dep, ha ka por ba jur bha ka jingshit kaba jur bha, kynthup ïa ka jingkiew kaba jur bha ha ki ïing ki sem jong ki riew shimet, khamtam ha ka thaiñ Paris, ong ka tnad ka koit ka khiah jong ka ri ha ka sngi U Blei.
Ki don palat 1,200 ngut kiba iap ha ka Sngi Balang jong ka taïew ba la dep, ha ka por ba ka France, ka dang tyrkhong bha hapdeng ka jingshit kaba jur bha jong ka suiñbneng, kaba la kiew sha ka 1,400 tam kiba khlad ha man ki ar sngi kiba bud, ong ka Public Health France. Ha u bnai Iaiong bad u Jymmang, shuwa ka jingshit kaba jur, ka jingiap ha France ka long kumba 900 haduh 1,000 ngut ha ka shisngi.
Ka tnat ka la pynkut ba ka France ka la mad ïa ka jingïap baroh kaba ym duna ïa ka 1,000 ngut tang ha kito ki lai sngi ba ka jingshit ka jur haduh katta, ka jingkheiñ kaba ka la maham ba ka lah ban nang kiew katba nang lum shuh shuh ïa ki jingtip, kynthup ïa ki jingïap ha ïing.
Ka jingkiew ka jingshit ka long kaba jur bha ha ki jaka ba don hapoh ki jingmaham rong saw jong ka jingshit kaba jur, la ong ka khubor. Kita ki jingmaham ki la tap kumba lai bynta na ka saw bynta jong ka ri ha ka por ba jur bha ka jingshit. Ka tnad ka iathuh ba 85% na kiba iap ki dei ki briew kiba la 65 snem shaneng.
Ha kylleng ka Europe, ka jingshit kaba jur ka la bud sa ki eriong kiba jur bha.
Ha Gohrischheide, kaba don sha ka phang shatei lam mihngi jong ka Germany, ka la kem ding ha kawei ka khlaw kaba heh kaba dang don ha ki tiar siat na ka thma bah ba ar, kaba la pynlong ia ka jingpyrshang jong ki nongpynlip ding ban kham jynjar shuh shuh.
Kumjuh ruh, ka jingpynlip ding kaba heh, ka dang iaid ha ka thain shatei lam mihngi jong ka Germany, hajan ka shnong Traisen, ha kaba ka jingshit, ka la pynmih ia ka ding khlaw, ha kawei ka jaka, kaba don ruh ia ki tiar ialeh, ki bym pat bthei. Ki nongpynlip ding ki la hap ban sangeh shipor hadien ba la jia ki jingbthei bad la wanrah ia ka kynhun pynlip tiar ban bteng ban bishar bniah ia ka jinglong jingman, la iathuh ka tnad pathai khubor jong ka German dpa.
