Tomblaine, Jylliew:
Ha kane ka jingjia la ong ba 11 ngut ki la duh ei noh ia ka jingim hadien ba kawei ka liengsuiñ paidbah kaba rit, ka la leit hap bakla ha ka thaiñ Mihngi jong ka nongbah Tomblaine jong ka ri France.
Katei ka liengsuiñ ka leit hap hajan ka nongbah jong ka Nancy ha ka por kumba 11 Baje mynstep jong ka Sngi U Blei.
La ong ba ki tnat iarap ba kyrkieh, ki la ialeh ban leit her mar-mar sha katei ka jaka ba hap ka liengsuiñ bad ki bor pyniaid ki dang wad bniah halor ka daw jong katei ka jingjia.
Ki bor pyniaid jong katei ka jaka, ka iathuh ba katei ka liengsuiñ ka dei jong ka skul ‘Parachutist’. Baroh 11 ngut kiba shong ha katei ka liengsuin, kynthup ia 5 ngut ki samla pule, 5 ngut ki nonghikai bad u nongniah liengsuin, ki la khlad noh ha katei ka jingjia aksiden.
Ka tnat kam pohiing jong ka France, ka la shimkhia ia katei ka jingjia bad ka la ong ba u Myntri kam poh iing, u dang don ha lynti ban leit sha katei ka jaka naka bynta ki jingtohkit ba bniah haba iadei bad katei ka kam.
Ia ka daw jong ka jinghap katei ka liengsuiñ ym shym la lah ban tip mardor.
Kat kum ka kaiphod na ki lad pathai khubor, la ong ba katei ka liengsuiñ kaba la rijistar da ka Germany, ka la hap ha ka jaka phlang kaba don hajan ka lynti ïaid liengsuiñ jong ka Nancy-Essey Aerodrome, hajan ka jaka shong briew bad ar tylli ki surok.
Ki kynhun ai jingïarap ha ka liang ka koit- ka khiah ki dang ialeh ban ai jingsumar ïa kiba haïing hasem jong ki nongshah pynïap kiba la don ha kad liengsuiñ, bad kumjuh ruh ïa kiwei pat ki nongsakhi.
La plie ïa ka jingtohkit ba kyrpang, ong u Amaury Lacote, uba dei u symbud nongbishar paidbah ha ka nongbah Nancy, kaba don sha ka phang Mihngi jong katei ka ri.
“U Yves Segyt, Prefect jong ka Meurthe-et-Moselle, u la rai ban pyntreikam ïa ka jaka treikam jong ka tnat (COD) ha ka jingdon jong baroh ki jingshakri treikam khnang ban pynthikna ïa ka jingpeit bniah ha ka por ba shisha ïa ka jingjia. U Prefect u don ha katei ka jaka,” la bynrap shuh shuh.
Ki pulit ki la kyrpad ruh ïa ki paidbah ba kin kiar lut na ka bynta jong ka Salvador Allende Street.
