Venezuela, Jylliew:
Katba ki kynhun pyllait im ki dang leit ban khyllie ia ki kynrum- kynram bad ki lyngkhot- lyngkhai jong ki iingmala ba la julor ha u jumai bah, uba la bam-duh ia shibun tylli ki mynsiem briew hadien jong 2 tylli ki jingkhynñiuh jumai ba jur ha Venezuela, la ong ba hapdeng ka jingwad jongki ia kito kiba dang sahkut ha ki thliew ki syar bad hapoh jong kitei ki kynrum- kynram na ki iingmala ba la twa bad julor, ki la shem pynban ia kawei ka longkmie kaba la kha ia i khun hapoh jong kitei ki kynrum- kynram kiba tap bad bhan najrong jongki.
Utei u jumai u la pynkhynñiuh ia ka thaiñ Northern jong ka Venezuela ha ka Sngi Balang, kata; ka 24 tarik u Jylliew, ha ka jingkhlaiñ ba 7.2 Magnitude ha ka sien bad nyngkong bad haduh 7.5 Magnitude ha ka sien kaba ar bad ka jingiapher jong kitei ki arsien khynñiuh jumai ka long tang 40 sekhon. La ong ba utei u jumai bah, u la pyn-madan ia ki iingmala ha kylleng ki bynta jong ka rud duriaw Caribbean, ha kaba, ka nongbah La Guaira ka long ka nongbah ba la shah ktah jur tam eh ha utei u jumai.
Kumta, la ong ba ia katei ka briew, la ithuh kyrteng kum ka Dr. Maria Fernanda Teran, ha kaba, ka la ioh ban kha ia itei i khun ha ka surok ba kawei ka iingmala ka la khyllem hapoh La Guaira. Hadien ba la iohi ia ka da ki nongiaid lynti, ki paidbah bad ki kynhun iarap ki la leit ban pynkit noh ia ka Teran bad ia itei i khunrit jongka sha ka jaka ba kham shngaiñ.
Ha kawei pat ka jingjia, la ong ba ki kynhun iarap ki la ioh sei ia i khyllung ba dang 18 sngi napoh ka iingmala kaba la twa hapoh Playa Grande, kaba don hapoh ka nongbah La Guaira hi bad la ong ba itei i khyllung ruh i dei iba la sahkut hapoh katei ka jaka ia kumba 32 kynta eiei.
Katba, ia ka kmie jong itei i khyllung pat, kaba la ithuh kum ka Dayana Patino, ki la ioh ban sei bad pyllait im noh tang hadien shi kynta ba la ioh sei ia i. Ki doktor ki iathuh ba itei i khyllung im shym la don dak shitom ne dak mong ne jingmynsaw eiei ha ka met jong i bad la sngewthuh beit ba kadei katei hi ka kmie kaba la da bad sumar ia i.
