Shillong, Risaw 18
Ka samla Rifiness Warjri kaba dei ka khynnah pule jong ka St. Anthony’s College kaba shong ba sah ha Laitkor Kynton U Mon Ladwahsnait bad kaba dang pule ïa ka B.Sc Botany, hadien ba la pynïasoh ïalade bad ka National Cadet Corp (NCC) Shillong ka la mihkhmat ïa ka Jylla ban shim bynta ha ka jingkiew lum. Katkum ki dur bad ki dur khih la sakhi ba ka kynhun jong ki nongkiew lum ki la kiew ïa u lum Abi Gamin uba dei u lum makashang uba don Uttarakhand Chamoli District.
U lum Abi Gamin u don ïa ka jingjrong haduh 7355 meter kaba mut haduh 24130 phut na khyndew.
Haba ïathuh shaphang ka jingïaid lynti jong ki kum ka kynhun na ka liang ka samla Rifiness ka la ong ba ïa ka bynta kaba nyngkong jong ka jingshah jied ka dei kaba la sdang na nongbah Shillong da kaba leit sha Guwahati bad ter ter shaduh Delhi. Ha shwa ban kiew ïa utei u lum bah la phiah ïa baroh ki dkhot jong ki nongkiew lum ha ki ar kynhun kiba kynthup ïa ka Alpha Team bad Bravo Team.
Ka samla Rifiness ka la ïathuh ba hapdeng ka jingïai pyrshang ban kiew ban poi sha kliar jong u lum ruh hynrei na ka jingsniew ka jinglong jong ka mariang kum ka kynhun Alpha kim lah ban pyndep ïa ka jingïaid lynti bad ki lah ban kiew tang hapdeng ka jingjngai kaba 6 hajar meter bad ka Bravo Team ka lah ban pyndep tang 4000 meter.
Ka samla Rifiness ka la ong ba kane ka jingïaid lynti ban kiew ïa ki lum ka pynsngewthuh ïa ka shaphang ka sap, ka jingkut jingmut bad ka jingdonkam ban ïatreilang kum ka kynhun ha kaba kane ka samla mynta kan pynkhreh ban kiew sa ïa u lum ba paw u lum Everest ha ki por ki ban sa wan.
