Shillong, Risaw 18
U Vice-President ka National Rifle Association of India (NRAI) bad uba long u President ka Shooting Association of Meghalaya (SAM) u Bah John F. Kharshiing u la ïashim bynta ha ka jingïasyllok halor ka ‘Draft National Sports Governance Bill 2024’ kaba la pynlong da ka tnat ïalehkai jong ka Sorkar Pdeng ha ka Sngi Palei ha nongbah Delhi.
Ha katei ka jingïalang la ïoh ban pynsngew ba ka long kaba donkam ïa katei ka bill ban ithuh ïa ki synjuk ïalehkai State Olympic Association kaba long kum ka shatri ïa kiba bun ki kynhun ïalehkai Olympic hapoh ki Jylla.
U Bah John u la pynsngew ruh ha ka jingïakren bad u Myntri ka tnat ïalehkai u Dr. Mansukh Mandaviya ba kam long kaba suk ban pyntreikam ïa ki aiñ ha man ki District kumjuh ha kaba ïadei bad ka jingïalehkai siat suloi namar tang ki Shooting Range ruh kim don bad kumta ka lah ban ktah kylla ïa ki jingïalehkai. Kane ka juh ka sur ka la mih na ki kynhun ïalehkai Gymnastics, Golf kiba la pynpaw ïa ki jingeh namar ka jingbym biang ki jaka ïalehkai ha ki District. Kumta ka jingkyrpad ka la long ban kyntu ïa ka sorkar pdeng ban pyrkhat bha kumno ban leh haba kum kine ki jingeh ba ki ïakynduh.
U Bah Kharshiing u la pynpaw ruh ba katei ka bill ka dei ban don ka jingbatai shaphang ki State Olympic kiba long ki tnat jong ka IOA hapoh ki jylla namar khamtam baroh kiba ïoh leit sha ka National Games ki hap ban thep kyrteng lyngba ka State Olympic Association bad ki long kiba ïa trei jan bad ki sorkar jylla ha kaba kyntiew ïa ki kam ïalehkai ha ki jylla.
Ka Dr P.T Usha, President ka IOA ruh ka la pynsngew ba ka long kaba donkam ban pynpaw shai da ki synjuk ïalehkai State Olympic bad ka la pynpaw ïa ka jingdonkam ban ïoh ïa ka Bill kaba mynjur da ka International Olympic Committee.
Na ka liang u Dr. Mansukh u la pynpaw ïa ka jingdonkam ïa katei ka Bill ban pynbeit ïa ki jingklumar ki mukotduma, ha kiba bun ki kynhun ïalehkai jong ka Ri India bad u la ai jingmut ba la donkam ruh ban thaw ïa ki lad ki lynti ha ka ban wad ïa ki sap (talent Identification) jong ki khynnah samla khnang ban ïoh ïa kiba kynsai bad ban pyrkhat hangno ban buh ïa ki lada lap ïa kum kita ki samla khnang ban saiñdur ïa ki namar ka ri india ka la buh ïa ka thong ban ïoh pynlong ïa ka Olympics ha u snem 2036.
