Beijing, Risaw:
U Jia Qingguo, dkhot jong ka Standing Committee ka CPPCC, u la ong ba ka China ka kham ibit ia ka Kamala Harris ban long ka nong-ialam ba thymmai jong ka US ban ia u Donald Trump uba la dep long teng kum u President jong ka US ha ki por ba la leit. Namar la ong ba lada u Trump un jop ia ka ilekshon President ha kane ka sien, ka jingiadei jong ka US bad ka China ka lah ban hiar noh bad ki kam ki jam baroh ki lah ban sahteng noh namar ka jingbym iabeit ha ki liang kiba bun.
Hynrei, la ong ba ka China kam kwah ban kren ne tuklar eiei haba iadei bad kane ka ilekshon President jong ka US, ka ban long ha u Naiwieng mynta u snem namar la ong ba ka China kam kwah ban shah kynthoh ne shah kren ba ka leit ban tuklar ia ki kam poh iing bad ki kam saiñ hima- sima jong katei ka ri.
Ka Chinese People’s Political Consultative Conference (CPPCC) ka long ka bynta ba kongsan kaba peit ia ka jinglong jingman bad ka rukom synshar-khad-dar hapoh China.
Kumta, la ong ba ka China ka la pynpaw ba ka dang lah ba kan iatreilang bad ka Harris ban ia u Trump namar ki jingeh ba ki la iakynduh teng bad utei u nongialam ha ka por ba u dang long u President jong ka United States mynshwa.
Ka China ka la ong ruh ba ha kitei ki por ba dang long President u Trump, ka jingiadei hapdeng jong kine ki arliang ri ka tlot bha bad baroh arliang ri ki ju iamih daw bad iashrut na ka por- sha ka por. Kumta, na ka liang jong ka China ka pynpaw ba lada ka Harris kan jop ia kane ka ilekshon President, ka jingiadei hapdeng ka China bad ka US ruh ka lah ban nang iai bteng bad ka don ruh ka jingkyrmen ba kan lah ban nang kham bha shuh-shuh namar ka Kamala Harris ka long hi ka nongbud jong u President ba mynta jong ka US- u Joe Biden.
