Kohima, Risaw:
Ka Nagaland State Disaster Management Authority (NSDMA) kan pynlong ïa ka Nagaland Emergency Preparedness Exercise (NEPEx) kaba ju pynlong manla u snem ha ka 25 tarik, Risaw, 2024.
Kane ka jingthmu ka long shi bynta ban pynbit pynbiang ïa ka jingpynkhreh bad ka jinglah ban ïaleh pyrshah ïa ki jingjia ba sngewsih ha kylleng ka jylla kiba wan na ki jingthombor jong ki bor ka mariang khamtam na ki jingkhynñiuh jumai. La ong ba kane ka Mock Drill kan long naduh ka por 9:00 baje mynstep shaneng ha kylleng ki jaka ba kongsan, kynthup ïa ka nongbah jong ka jylla bad ki jaka treikam jong ki distrik, ha ryngkat ka jingpynsawa ïa ki Siren, ong u Joint Chief Executive Officer u Johnny Ruangmei.
Shuh shuh la ong ba na kane ka Mock Drill kan khmih bniah ïa ka jinglah jong ka jylla haduh katno ka lah ban leh khnang ban ïaleh pyrshah ne ban ai jingïarap kaba kham kloi lada jia ba jia kino kino ki jingjia basngewsih.
Kan pynkhlaiñ shuh shuh ïa ki jingthmu na ka bynta ban lah ban pynkhreh ha ka imlang-sahlang katba dang bteng ban ai ki jingpynsngewthuh paidbah shaphang ka jingdonkam jong ki jingpyntreikam ha ki jingjia basngewsih.
Ka NEPEx kan pynleit jingmut ha ka jinglah jong ka Emergency Support Functions (ESF) bad pynthikna ba ka Standard Operating Procedures ka dang pyntreikam shakhmat halor kane ka bynta ha baroh ki bynta. Kane ka jingpyntreikam kan kyntiew ïa ka jingïatreilang bad ka jingïakren kaba khlaiñ hapdeng ki nongïashim bynta bapher bapher, kynthup ïa ki tnad sorkar, ki seng bhalang, bad ki kynhun jong ki riewpaidbah.
Ha kaba ïadei bad kane ka bynta la kyrpad ïa ki paidbah ba kim dei ban sheptieng ha ka por ba pynlong ïa ka Drill bad la kyntu ïa ki nongshong shnong bad ki nongïashim bynta ba kin ïashim bynta shitrhem bad ïatreilang ban pynlong ïa ka jylla kaba lah ban ïakhun pyrshah ïa ki jingjia ba sngewsih, la ong u Ruangmei.
Kumba la buh, la ong ba ïa kane ka Mock Drill yn pynlong ha Capital Convention Hall ha Kohima ha ka 22 tarik, Risaw.
Ïa kane la pynlong da ka NSDMA ban pynthikna ba baroh ki nongïashim bynta ki long kiba la pynkhreh bha ban pynïaid bad ban leh bha kumba ka dei ban long lada dei ban wan jia kiba kum kine ki jingthombor jong ki bor ka mariang.
