Shillong, Risaw 21
Ka kynhun treikam thymmai kaba la dap mynta shisnem thik jong ka Meghalaya Football Association (MFA) ka la lah ban pynkhie im biang ïa ka Thadlaskeiñ Sports Association (TSA) hadien kumba 10 snem eiei mynta.
Kane ka dei biang ka sienjam kaba ar jong ka MFA hadien ba la lah ban pynkhie im biang ïa ka Ri-War Mihngi Football Association mynta hi u snem.
Ka TSA kaba la don ha ka jingshah sospon naduh mynta lajan 8 snem eiei hadien ba kane ka synjuk ka khlem la lah ban treikam bha ki nongkitkam barim. Hynrei da ka jingshim khia pat mynta jong katto katne ki ‘riew ïeid phutbol jong katei ka thaiñ, ki la thaw da ka Adhoc Committee hapoh ka jingïalam u Chairman bad u Convenor ryngkat bad ka jingkyrshan da kumba 31 tylli ki ‘affiliated club’ jong katei ka synjuk.
Kane ka Adhoc Body ka la buh ka jingkyrpad sha ka MFA ban weng noh ïa ka jingshah sospon bad ban ïarap ruh ha ka ban pynlong ïa ka General Body Meeting ha ka ban jied ïa ki nongkitkam kiba thymmai.
Kumta ka MFA ruh khlem da pynslem ïa kane ka jingkyrpad, ka la thoh sha ka TSA ba kan pynlong noh kane ka general meeting bad ban buh ruh ïa ka tarik ban pynlong ïa ka jingïalang ha ka 19 tarik mynta u bnai ha community hall jong ka shnong Wahïajer ha kaba la pynïaid da u Bah Sunesh Syiem, uba long u General Secretary jong ka MFA.
“Ngi na ka liang ka MFA, ngi dap da ka jingsngew kmen kaba khraw ha kaba ngi lah ban pynkhie im biang ïa ka Thadlaskein Sports Association hadien ka jingbym treikam shuh mynta la bun snem. Kane ka thaiñ kaba ju paw bha ha ki por mynshuwa ban sei ïa ki khlur ïalehkai kiba la mihkhmat ïa ka Jylla bad ruh ïa ka Ri hi baroh kawei” la pynpaw u Bah Sunesh hadien ba la dep ka jingïalang.
Ha kaba kut, u Bah Sunesh Syiem u la kitbok-kitrwiang ïa ki nongkitkam ba thymmai jong kane ka synjuk ba kin long kiba kitkhia bad trei shitom na ka bynta ki khynnah ïalehkai jong katei ka thaiñ.
Ha katei ka sngi la jied ïa ki nong-kitkam bathymmai ha kaba la thung President ïa u Bah Kmenlang Shylla, Vice President ïa u Bah Ebris Pariat bad Bah Mutchwa Thabah, General Secretary ïa u Bah Ebormi Lyngdoh, Assistant General Secretary ïa u Bah Herperty Khyriem, Treasurer sha u Bah Pyrkhatbha Lamare bad kiwei ki secretary jong ki tnat bapher-bapher bad ki Executive Member.
