Seoul, Risaw:
Ka South Korea ha ka Sngi Nyngkong, ka la phah mih ia u nongrah ktien ka Russia ban pyrshah ia ka jingthmu jong ka North Korea ban phah ia ki hajar ngut ki shipai jong ka na ka bynta ban leit ai jingkyrshan ia ka Russia hapdeng ka jing-iakhun thma pyrshah ia ka Ukraine. Namar la ong ba palat 1,500 ngut ki shipai ka North Korea ki la don lypa ha Russia, ia kiba ka North Korea ka la dep pynbeit bad ka Russia ba kin leit ban iarap ia ka Russia hapdeng ka jing-iakhun thma jong ka Russia sha Ukraine.
Namar la ong ba ka South Korea naduh ki por ba la leit, ka la kynnoh ba ka North Korea ka ju phah ia ki tiar thma sha ka Russia bad kiba ka Russia ka ju pyndonkam ha ka jingleit hiar thma sha Ukraine.
Kane ka long ruh hadien ba u nong-ialam ka North Korea- u Kim Jong Un bad u President ka Russia- u Vladimir Putin, ki la soi ia ka jingiateh kular ha u Jylliew jong une u snem ba ka tnat shipai jong ka North Korea kan iatrei lang bad ka tnat shipai Russia bad ba kin ia ai jingkyrshan markylliang ha ki por ba iakynduh jingeh.
Kumta la ong ba u Symbud Myntri kam bar ri ka South Korea, u Kim Hong-kyun u la pynpaw ïa ka “jingkhuslai kaba jur jong ka Seoul ha kaba ïadei bad ka jingphah shipai jong ka North Korea dang shen sha Russia bad u la kyntu jur ban weng noh mardor ïa ki shipai jong ka North Korea bad ban pynsangeh noh ïa ka jingïatreilang kane.
