Shillong, Risaw 21
Ka jingpyrshang ban ïakhun tyngeh ka Meghalaya pyrshah ïa ka Tripura ka la poi noh sha kaba kut hadien ba ka la shah rem noh da shi inning bad 17 ron ha ka Ranji Trophy 2024-25 Elite Group A kaba la long ha madan ïalehkai kriket jong ka MCA ha Polo.
Haba wan ban sdang biang ïa ka sngi hadien ba ka la lah ban kamai 3 run, ka Meghalaya ka la hap noh 3 wiket khlem da lah ban kamai wat tang shi ron ruh. Kane ka wan urlong lyngba ka jingïalehkai bha ki nongkawang bol jong ka Tripura kiba la lah ban pynkut kloi ïa ka pali wan tied ba ar jong ka Meghalaya.
Kum ban shu phai dien biang ïa kane ka jingïakhun, ka Tripura tang ha ka sien tied ïa ka pali kaba nyngkong ka la lah ba kan kamai 377 run hadien ba ka la hap noh 8 wiket.
Hadien ba la rai ban khylliap noh ïa la ka pali, ka Meghalaya ha ka jingwan tied kaba nyngkong ka la lah ba kan kamai 222 run. Ha ka sien wan tied jong ka pali ba ar ka la lah ba kan kamai tang 122 run bad ban mad ïa ka jingshah rem.
U nongkawang bol ka Meghalaya u MB Mura Singh u la shim 5 wiket na ka bynta 44 run ha ka pali nyngkong bad ha ka pali ba ar u Mura u la shim 6 wiket na ka bynta 52 run. Kane ka la biang pura ïa u ban ïohpdiang syndon ïa ka nam Man of the Match.
Da kane ka nam rem ha la ïing, ka Meghalaya kan pynkhreh ban mih na la ïing ban leit ïa aireng pyrshah ïa ka Maharashtra ka ban long ha Aurangabad naduh ka 26 tarik mynta u bnai.
