Imphal, Risaw:
Ki pulit hynnin ka sngi, ki la ïathuh ba ki la ïoh ban kurup ïa ki tiar siat bad ki tiar pynbthei ha Kangpokpi distrik jong ka jylla Manipur.
Kane ka jingïoh ban kurup ka la long ha ka por ba la don ka jingleit khynra ha Aigejang ka shnong kaba don ha kane ka distrik, la ïathuh shuh shuh ki pulit.
Kawei ka suloi .303, kawei ka 9mm CMG ha ryngkat u kuli, ka pistol 9 mm, ka SBBL ha ryngkat ar tylli ki 51mm Mortars, ar tylli ki bom kawang kti, san tylli ki kuli ki bym pat pyndonkam, bad ar tylli ki Smoke Grenades la ïoh ban kurup, la bynrap shuh shuh ki pulit.
Ïa ka jingleit khynra bad ka jingleit kerkut ïa ka thaiñ la leh da ki shipai ïada ri ha ki thaiñ kiba hap hapoh ki jaka lum jong ka distrik.
Ha kane ka por ba mynta, ki pulit ki dang ïaleh ban pynïaid beit bad ym pynthut ïa ki jingïaid jong ki 194 bad 205 tylli ki kali kiba ju kit ïa ki mar ba ju pyndonkam man ka sngi ha ki bynta jong ka surok NH-37 bad NH-2.
Ki la don ki jingpyntreikam kiba pyrkhing ha baroh ki jaka kiba don jingma bad ka kynhun jong ki shipai ka la khmih bniah ïa ki rukom ïaid jong ki kali. ki la don baroh kumba 109 tylli ki Nakas/Checkpoints ba la buh ha kiba bun ki distrik jong ka Manipur, ha baroh ar, kata ha ki jaka lum bad ki jaka ba long them bad haduh ba la thoh ïa ka khubor ym pat don mano mano ruh ban shahkem ha ki pulit ha kaba ïadei bad ki jingpynkheiñ ïa ki kyndon halor kiba bun ki kam sniew ha kiba bun ki distrik jong ka jylla.
