Ottawa, Risaw:
Katkum ki khubor, la ong ba 2 ngut ki suba donkti ban pyniap ia u Ripudaman Singh Malik, uba dei u jaitbynriew Sikh uba la shah pyniap ha ka jingleit thombor ki lehnoh ha 1895 Air India Kanishka, ha kane por pat la lap ba kitei ki 2 ngut ki dei shisha kiba don kti ha katei ka jingpyniap ia utei u briew bad ia kane ka lap da ka ïingbishar jong ka Canada.
Kumta, la ong ba kitei ki 2 ngut kiba kynthup ia u Tanner Fox bad u Jose Lopez, ki la shah ialam hakhmat ka ïingbishar jong ka British Columbia (BC) Supreme Court ha ka Sngi Nyngkong ha kaba la pynsngap bad bishar bniah ia katei ka jingjia ha kaba u Ripudaman Singh Malik uba la don 75 snem ha katei ka por, u la shah siat iap ha ka 14 tarik u Naitung 2022.
U Malik u la shah siat iap ha ka nongbah Surrey jong ka British Columbia ha u snem 2022.
Kumta la ong ba hapoh ka ïingbishar ha New Westminster ha ka Sngi Nyngkong, baroh ar ngut u Fox bad u Lopez ki la paw ba ki don kti ban pyniap ia utei u briew ha utei u snem ba ki la shah pharep.
Namar la ong ba ka ïingbishar ruh ka la ioh ia ki sabut ba don ba phah pateng ia kitei ki 2 ngut lane ban shu ong noh, ba kitei ki 2 ngut ki dei ki nongshim wai ia katei ka kam pyniap briew bad ba kin leit ban pyniap ia u Malik ha utei u snem 2022.
Hynrei na ka liang ki bahaiing-bahasem jong u Malik, ki la ong ba wat la ki la sngewhun bad sngewkmen ba ki la lah ban pynioh ia ka hok jong u Malik uba la shah pyniap dusmon ha kitei ki 2 ngut, hynrei ka jingpang mynsiem bad jingduh jong ki ia u dkhot jong ka iing kam pat iahap eiei. Ka jingpynshitom ba kitei 2 ngut kin shah pynsaja lane wat lada shim noh ia ka jingim jong kitei ki 2 ngut ruh hynrei kam lah shuh pat ruh ban wanrah jingkmen biang sa shisien pat ia ka iing- ka sem.
Wat la katta, la ong ba kane ka kam, kam pat kut satia namar u Tanner Fox bad u Jose Lopez ki long tang ki nongshah bthah ban leit pyniap ia u Malik. Dei tad haduh ba ynda ioh kem ne lap ia ki nongbthah ban pyniap ba ka iing kan sa lah ban pdiang ia ka jingbishar kaba hok.
Ka jingshah pynbthei bom ka 1985 Air India ka long kawei na ki jingjia thombor ba shyrkhei tam jong ki lehnoh ha ka histori jong ka Canada bad kumjuh ruh ha ka jingiaid lynti jong katei ka Kad Liengsuiñ baroh shi katta ki phew snem.
Namar la ong ba ha u snem 1985 pat, kawei ka liengsuiñ jong ka Air India hi, ka dei kaba kit ia 329 ngut ki briew, kynthup ia 268 ngut ki nong Canada bad 24 ngut ki nong India, ha kaba kane ka liengsuiñ ka dei kaba mih na ka nongbah Toronto ban leit hiar sha Montreal, bad ka ban sa leit poi sha London bad khatduh eh ka ban sangeh ha Bombay. Bad la ong ba dei ha ka por ba katei ka liengsuiñ ka la her kumba 31,000 phut ka jingjngai shalor suiñ katba dang ïaid lyngba ia ka duriaw Atlantic Ocean, ha kaba kawei ka synduk ‘suitcase’ ka la bthei na ki bynta ba shakhmat jong katei ka liengsuiñ bad baroh kiba don ha katei ka liengsuiñ ki la khlad noh khlem da don wat tang uwei ruh uba lait-im na katei ka jingjia.
Kumjuh ruh ha kitei hi ki por, sa uwei pat uba la thmu ban pynbthei ia kawei ka liengsuiñ Air India kaba dei ban mih na Japan hynrei ka la bthei noh hapoh ka Kad Liengsuiñ Narita na ka nongbah Tokyo jong ka Japan, ha kaba 2 ngut ki nongtrei jong katei ka Kad Liengsuiñ ki la duh ei noh ia ka jingim ha katei ka jingjia.
