Ranchi, Risaw:
Ki la don bun ngut ki nongïalam jong ka seng BJP kynthup ïa lai ngut ki MLA barim kiba la leit ban pynïasoh bad ka seng Jharkhand Mukti Morcha (JMM) khyndiat taïew ha shwa ban pynlong ïa ka ilekshon Assembly ha ka jylla.
Kine ki MLA barim kiba la kyntiap seng ha ka Lah Sngi U Blei, ki dei ka Lois Marandi, u Kunal Sarangi bad u Lakshman Tudu. Kane ka jingkyn-tiap seng ka la long tang hadien ar sngi hadien ba u MLA jong ka BJP uba la long MLA la lai sien u Kedar Hazra bad u nongïalam jong ka seng AJSU u Umakant Rajak ki la pynïasoh ïalade sha ka seng JMM.
Ka Lois Marandi, ka nongthaw MLA barim ka BJP, ka la jop ha u snem 2014 ïa u Myntri Rangbah ka Jylla, u Hemant Soren, da ka jingïapher kaba 5,262 vote na Dumka. Kham hadien ba ka Lois ka la pdiang ïa ka JMM, u Myntri Rangbah jong ka Jharkhand u Hemant Soren u la pdiang burom ïa ka sha ka seng.
“Ngi pdiang sngewbha ïa ka Vice President barim jong ka seng BJP bad ka heh nongïalam ka Lois Marandi Ji sha ka longïing jong ka seng JMM,” la phah jingthoh u Soren ha rynsan X.
Ha u snem 2019, u Soren u la jop ïa ka Dumka konstitwensi da ka jingiapher kaba 13,188 vote. Hynrei u la pyllait noh ïa katei ka konstitwensi bad u la bat ïa ka konstitwensi Barhait. U hynmen jong u u Basant Soren u la pynliem ïa ka Marandi da palat 6,842 vote ha ka jaka ba khlaiñ treikam bha ka seng ha Dumka ha ka jingthep vote ha ka ilekshon shiteng samoi.
Ka Marandi la kdew shai ba kumno ka BJP ha ka sien kaba nyngkong ka la jop ïa ka Dumka, kaba la kheiñ kum ka kut jong ka JMM, ha u snem 2014 naduh ba la ïoh ïa ka jinglaitluid.
U Sarangi, ha u bnai Kyllalyngkot, u la iehnoh ïa ka jinglong dkhot ba kongsan jong ka seng, kumba shibnai shiteng, hadien ba u la hiar shuki na ka kam kum u nongaiktien jong ka seng ha Jharkhand.
U la phah ïa ka shithi iehnoh kam jong u sha u president ka BJP ha Jharkhand u Babulal Marandi, da kaba kdew ïa ki jingeh bapher bapher ha ka seng bad ki jingeh kiba ïadei bad ki paidbah ha East Singhbhum district.
U Lakshman Tudu ha u snem 2014 u la pynliem ïa u Ramdas Soren ka JMM na Ghatshila konstitwensi da ka jingïapher kaba 6,403 vote.
