Shillong, Risaw 22
U Balawanhabor Rynjah uba long u nongkiew lum ka Jylla hapoh ka lama jong ka Meghalaya Sport Climbing and Mountain-eering Association (Me-SCMA) u la shah jied ban shim bynta ha ka jingshah pyntbit ban kiew lum lane ka Basic Mountaineering Course (BMC) ha Himalayan Mountaineering Institute (HMI) kaba ha Darjeeling naduh 21 tarik mynta u bnai haduh 17 tarik u Naiwieng mynta u snem.
Ïa une u samla uba pule ha Sankardev College, la kyrshan lyngba ka tnat ïalehkai jong ka Sorkar Jylla na ka bynta katei ka jingleit shah pyntbit haduh shi bnai kynthih.
Ka BMC ka dei ka jinghikai kaba skhem na ka bynta ki shynrang bad ki kynthei ha ka jingkiew lum bad ki jingthmu jong ka BMC ki long ban hikai ïa ki buit ba kongsan jong ka khih ka ksaid halor u maw, u slap bad ha u thah. Ki bynta ba ïadei bad ka theory bad ka jingtreikam jong ka jingkiew lum bad ki sobjek kiba ïadei bad ka, kum ka jingpule ïa ka Map, ka jingpynïaid lieng, ka jinglong ka suiñbneng, ki dawai, ka jingkhuid jingsuba jong ki lum bad kiwei kiwei. Ban pynrung ïa ka jingmut kaba dei hapdeng ki nongshah hikai kaba pynlah ïa ki ban peit ïa ka jingkiew lum kum kaba kongsan ym tang kum ka kam kaba ïalehkai ne kaba sngewtynnad. Ban pynshlur ïa ki briew na ki bynta bapher bapher sha ka jingpyrshang kaba kham halor. Ban pynbiang ïa ki nongshah hikai, ki kot pule kiba ïadei bad ka jingkiew lum. Ban hikai ïa ki kumno ban pynlong ïalade kiba suk bad ban pynïoh ïa ka koit ka khiah jong ki. Ban pynkhlaiñ ïa ka met ka phad jong ki da kaba kyntiew ïa ka jinglah ban ïaleh pyrshah ïa ka jingkhriat, ka jingthngan bad ka jingthait.
