Mawkyrwat, Risaw 23
Ka Rangjadong SC ka la pynliem noh ïa ka Rangkhraw FC da 2-0 kol ha ka lympung ïalehkai Golden Jubilee Football Knockout Tournament 2024 ba la pynïaid da ka Nonglang Sports Club ha ka Sngi Balang ha madan Pyndenïewlyngdoh kaba ha Nonglang, South West Khasi Hills District.
Kane ka nam jop ka la wan urlong lyngba u Benrap Thongni bad u Shaiñborlang na ka bynta ban ïoh ïa ki lai point.
Ha kane ka jingïakhun baroh ar ki kynhun ki la pyrshang ban ïakhun tyngeh naduh kaba sdang. Hadien shiteng kynta ka Rangjadong ka la ïoh ban pynkhih jar nyngkong eh lyngba u Bynraplang Thongni ha ka minit kaba 35. Kane ka kynhun ka la thep biang sa shi kol hashwa ban wai lyngba u Shaiñborlang ha ka minit ba 86 na ka bynta ban khur syndon ïa ka jingjop.
Ïa ka nam rangïalehkai ba kynsai ha kane ka sngi la ïoh ban khur da u Hulbinroy Khardewsaw uba long u rangapkol ka Rangjadong bad ïa kane ka khusnam la sam da u Bah Kordorlin Lyngdoh, Secretary ka Nonglang SC.
Na ka liang ka Nonglang SC ka la pyntip ruh ba ka jingïalehkai ka ban bud ha ka 26 tarik kan long hapdeng ka PNR Jr. FC pyrshah ïa ka Teilang United FC ha madan Pyndenïewlungdoh Nonglang SWKHD ha ka por 2 baje janmiet.
