Shillong, Risaw 23
Ka Real Madrid ka la wan beh nadien ban pynliem ïa ka Borussia Dortmund da 5-2 kol ha ka Champions League kaba la long ha ka sngi Balang bad u Vinicius Junior u la ïoh hat-trick. Ka Aston Villa ha kane ka lympung ka dang ïai bat ïa ka kyrdan ba ha khlieh.
U Vinicius u la lah ban thep lai kol ha ka kylla miet ha kaba ka Madrid ka la thep biang sa ar kol na ka bynta ban pynlong ïa ka Real ban jop syndon.
Ha kane ka jingïakhun ka Dortmund ka la pyrshang ban ïakhun tyngeh naduh kaba sdang ha kaba ka la ïoh ban thep ar kol ha ka kylla step lyngba u Donyell Malen ha ka minit kaba 30. Kumta hadien 4 minit ka la pynbud biang ïa ka kol kaba ar lyngba u Jamie Bynoe Gittens na ka bynta ban tam 2-0 kol ha ka kylla step.
Hynrei tang hadien katto katto katne por ba la bteng ïa ka jingïakhun jong ka kylla miet, ka Real ka la lah ban pynphai kylla lyngba u Antonio Rudiger ha ka minit kaba 60. Kumjuh u Vinicius Junior u la thep haduh lai kol (62,86 & 90+3) na ka bynta ban khur syndon ïa ka hat-trick. Ïa kawei pat la thep da u Lucas Vazquez (83) na ka bynta ban pynlong ïa ka Real ban khur syndon ïa ka jingjop.
“Ka la long ka jingjar jar haba ngi rung sha kamra hadien ba ngi la shah thep haduh 2 kol ha ka kylla step,” la ong u Vinicius ba dang 24 snem ka rta.
“Hynrei ngi la sdang ïa ka jingai jingmut u coach (Carlo Ancelotti) bad ngi la mynjur ban ïalehkai bha naduh mynsiem. Lada ngi lah ban thep kol, ngin sa lah ban wanphai da ka jingjop,” u la bynrap.
Da kane ka jingjop ka Real jam sha ka kyrdan ba khyndai bad ka la ïaryngkat mar 6 point bad ka Dortmund.
Haba phai sha kawei pat ka jingïakhun ka Aston Villa ka la pynliem noh ïa ka Bologna da 2-0 kol na ka bynta ban bteng ïa ka jingjop kaba lai bad ban bat ia ka kyrdan ba hakhlieh da kaba kamai 9 point.
Kane ka nam jop ka la wan urlong lyngba u John McGinn uba la thep ha ka minit kaba 55 bad u John Duran ha ka minit kaba 64.
