Jerusalem, Risaw:
U Secretary of State jong ka US, u Antony Blinken haba ai jingkren shaphang ka Israel ha ka Sngi Ba-ar, u la ong ba ka jing-iap jong u heh nongialam ka Hamas- u Yahya Sinwar, ka pyni ba kam don jingeh shuh ban pynkut noh ia ka thma hapdeng ka Hamas bad ka Israel ha Gaza.
Kumta, u Blinken u la ong ba ka jingiap jong utei u nongialam ka Hamas ka long ka kabu kaba biang tam ban ioh wanrah biang ia ka shongsuk- shongsaiñ ha Gaza bad ruh ha Israel. Ia kane, u Blinken u la kren ha u President ka Israel- u Isaac Herzog hadien ka jingiakren bad u Myntri Rangbahduh ka Israel.
U Blinken u la ioh ruh ban iakynduh bad ki bahaiing-bahasem jong kiba shah rahbor ha ki lehnoh Hamas bad kiba la shah bat slem ha kine lehnoh naduh ka 7 tarik u Risaw 2023 ba ka Hamas ka la leit thombor sha Israel bad rahbor ruh ia kine briew na ki thaiñ khappud jong ka Israel ha katei ka por.
Kumjuh ruh u Herzog, u la ong ba ka jingioh pyniap jong ka Israel ia utei u nong-ialam ka Hamas, uba long u nongsylla bad u nongpyniaid ia ka jing-leit thombor ka Hamas sha Israel ha u snem 2023, ka long ka lad kaba biang tam ia ka Israel ba kan wanrah jingkylla ha kane ka por.
