Kyiv, Naitung:
Katkum ki khubor, laong ba ki ‘namding jong ka Russia ki la leit bthei bad pynjulor ïa ka nongbah Kyiv jong ka Ukraine ha ka step jong ka Sngi U Blei, ha kaba ym duna ïa 3 ngut ki riew paidbah ki la mynsaw ha katei ka jingjia, katba ki jingshah thombor ha kiwei pat ki bynta jong ka ri, hadien ki la pyniap ïa ym duna ïa ka arngut ki briew, la iathuh ki heh sorkar katei ka thaiñ.
Ki jinghiar thma ki la jia ha ka por ba ka jingjop jong ka Ukraine da ki drone ka la pyntroiñ ïa ki shipai Russia ha ka jingiakynad kaba la neh slem bha bad ka Russia kaba la wanrah ïa ka jingkyrduh umphniang ha katei ka ri.
Ha ka bynta ba Shatei Lam Mihngi jong ka Ukraine, kaba la bat da ka Russia, ki bor ba la buh da ka Russia, ki iathuh ba ka jinghiar thma jong ki drone ka Ukraine, ka la shim ïa ka jingim jong 4 ngut ki riew paidbah ha ka nongbah Horlivka. Katkum ka jingpynbna jong u Ivan Prikhodko, uba long u nongmihkhmat jong katei ka nongbah, uba la shah thung da ka Russia, katei ka nongbah, ka la shah thang naduh ka por step jong ka Sngi U Blei.
Katkum ka khubor na ka tnat iada jong ka Russia, la iathuh ba ki shipai Russia ha ka shimiet ki la ioh ban siat pynhap haduh 133 tylli ki drone ba la phah leit thombor da ka Ukraine sha ki suiñ jong ka Russia, ha Black Sea bad sha ka nongbah Crimea, ka dewlynnong kaba ka Russia ka la knieh jubor na ka Ukraine ha u snem 2014.
Kitei ki jingiakhun ki la pynkhynñiuh bad pynkhihwin ïa ka nongbah Kyiv baroh kawei ha katei ka step Sngi U Blei, ha kaba ki jingtwa kiba la khyllem bad julor noh, ki la wanrah ïa ka jingpluh kaba jur ha kawei ka ïing mala kaba heh bha kaba don hajan katei ka jaka ba pawnam, ong u mayor u Vitali Klitschko.
U President ka Ukraine, U Volodymyr Zelensky, u la maham, ha ka jingkren jong u ha ka taïew ba la dep, ba katkum ka jingwad bniah jong ki tnat syntiat ka ri, ki pyni ba ka Russia, ka dang pynkhreh ban leit thombor ïa ka Ukraine da ki ‘namding, na ka bynta ban nang pynjur shuh- shuh ïa ka jingleit hiar thma sha Ukraine, ha kaba u la ong ba ki don ki dak, ba katei ka jingiohi lypa ki tnat syntiat, ka lah ban jia, hapoh jong ki 48 kynta ban wan.
Ka tnat iada ri jong ka Russia, ka la kam ha ka Sngi U Blei, ba ka jinghiar thma kaba khatduh jong ka, ha Kyiv, ka la hiar thma ïa ki jaka, kiba don jingiadei bad ka jingpynmih drone.
Kumjuh ruh ha ka Sngi U Blei, ka jingshah thombor jong ki drone ha Kharkiv – kaba dei ka nongbah kaba ar ha ka heh jong ka Ukraine ha ka liang mihngi- ka la pyniap ïa uwei u briew bad pynmynsaw ym duna ïa ka 6 ngut kiwei pat, kynthup ïa arngut ki khynnah, ong u mayor Igor Terekhov.
Ha ka nongbah Zaporizhzhia, kaba don Shatei Lam Mihngi, ka jingbthei ki bom jong ka Russia, ka la shim ïa ka jingim jong uwei u briew bad kumba 6 ngut kiwei pat ki la ngat bad mynsaw ha katei ka jingjia.
Baroh ar tylli ki nongbah Kharkiv bad Zaporizhzhia ki ju long ki jaka ba ju shah thombor ha ka Russia, ha kaba ka Zaporizhzhia – kaba jngai tang kumba 20 kilomitar (12.5 mile) na u lain ba shakhmat – ka la shah bom jur bha ha kine ki bnai ba ladep.
