Shillong, Risaw 23
Ka India ka la shah rem noh ha ka Germany da 0-2 kol ha ka jingïakhun ba ar jong ka bilateral series kaba la long ha ka Sngi Balang ha madan ïalehkai Major Dhyan Chand National Stadium ha nongbah New Delhi.
Kane ka la wan rulong lyngba ka jinglah ban ïalehkai bha ki rangïalehkai ka Germany ha kaba u Henrik Mertgens u la thep ïa ka kol nyngkong ha ka minit kaba saw. Ha ka jingwad jong ki ban pynïakhaid, ka India kam shym la lah ban pynurlong. Hynrei shwa ban wai u Lukas Windfeder u la ïoh ban thep lyngba ka penalty corner na ka bynta ban pynlong ïa ka Germany ban khur syndon ïa ka jingjop.
Lah ban kdew ba ka jingshah rem ka India ha kane ka jingïakhun ka dei na ka daw ka jingpynlehnohei ïa kiba bun ki kabu ksiar kiba ka la ïoh bad ka la khmih lynti ban wanphai da ka jingkhlaiñ bor ha ka jingïakhun ka ban long ha ka Sngi Palei.
