Washington, Risaw:
Ka Treasury Secretary jong ka US, ka Janet Yellen ha ka Sngi Ba-ar ka la iathuh ba ka United States ha kane ka por ka la pynkhreh ban pynbna da ia kiwei pat ki jingpynngat kyndon pyrshah ia ka Russia. Kane ka lah ruh ban kynthup ia kito ki ri kiba leit ban ai jingkyrshan ia ka Russia hapdeng ka jing-leit hiar thma jong ka Russia sha Ukraine.
Namar la ong ba ka US kan pynngat da ki kyndon kiba kham eh ha kane ka sien ban ai jingsneng ia ka Russia bad ia kito ki ri kiba ju ai jingkyrshan ia ka Russia da ki tiar ïaleh thma kiba khlaiñ bor.
Kane ka jingkren jong katei ka heh na US, ka long ruh hadien ba ki heh ka pyrthei ki la dep ban iakynduh lang bad ban ia pyrkhat kam hapoh ka nongbah Washington jong ka United States ha kane hi ka taiew na ka bynta ban ia pynbeit ia ka jing-ialang ba shisien shi-snem jong ka International Monetary Fund & World Bank.
Kumta, la ong ruh ba kine ki jingpynngat kyndon pyrshah ia ka Russia kin long ban pynsaja ia ka Russia namar ka jingleit hiar thma ba khlem sangeh jong ka sha Ukraine bad ban pyntroiñ ia ka ioh-ka kot bad ka jinglut-jingsep jong ka Russia khnang ba kan nym lah shuh ban khie- khlieh nangne shakhmat lada kam lah ban kohnguh ia ki jingbthah bad jingdawa ba ka dei ban sangeh noh ia ka thma ha Ukraine.
Namar la ong ruh ba ka United States ka dang pyn-ap ia ka ilekshon President ka ban long noh shen ha une u bnai u ban wan, ha kaba u President barim ka US – u Donald Trump, un ïakhun pyrshah ia ka Vice-President jong ka seng Democratic- ka Kamala Harris.
Kumta ruh la ong ba ka jingiakhun hapdeng jong utei u nongialam barim ka US bad kane ka Vice-President ka US, ka long kaba iakhaid bha bad la i-kumba kiba bun ki kwah ban iohi ia ka jingkylla hapoh US da kaba ailad noh ia ka Harris ban long ka nongialam jong katei ka ri ha kane ka sien. Katba, don bun ruh kiba kwah ia utei u President barim ba un ioh ban ialam biang ia ka US, khnang ban pyllait ia ka US na ki jingeh bad jing jynjar kiba ka iakynduh mynta la bun snem naduh ba wan lynshop ka khlam Covid-19 ia ka pyrthei baroh kawei.
