Shillong, Risaw 24
Ka Shillong Lajong FC kan sdang da ka jingïalehkai ha la ïing pyrshah ïa ka Churchill Brothers ha ka 24 tarik u Naiwieng mynta u snem ha ka lympung ïalehkai I-League 2024-25, la pynbna ka All India Football Federation (AIFF) ha ka Sngi Palei.
Ïa katei ka jingïalehkai yn pynlong ha Jawaharlal Nehru Stadium, Polo ha ka por 7 baje mynmiet.
Kat kum ka jingpyllait kyrwoh da ka AIFF, la ong ba ïa kane ka lympung yn sdang ha ka 2 tarik u Naiwieng ha kaba ka Sreenidi Deccan FC kan ïakynduh pyrshah ïa ka Gokulam Kerala FC ha Deccan Arena kaba ha Hyderabad ha ka por 4.30 janmiet, katba ka Inter Kashi kan ïakhun ha la ïing pyrshah ïa ka Bengaluru ha Naihati Bankimanjali Stadium kaba ha Naihati ha ka por 7 baje mynmiet.
Ha kane ka lympung kin don 12 tylli ki kynhun ki ban ïalehkai haduh u Nohprah, Kyllalyngkot, Rymphang bad Lber ka ban pynkut ha ka 6 tarik Ïaïong 2025. Ka Sporting Club Bengaluru bad ka Dempo SC ki dei ki ar tylli ki kynhun kiba la wan rung thymmai sha kane ka lympung hadien ba ki la long ki lahduh bad wan ba-ar ha ka Second Division I-League 2023-24.
U Secretary General ka AIFF u Anilkumar u la ong, “Mynta ka sngi ngi la don ka jingïalang bad ki trai jong ki klob I-League, bad ka la long kaba ïaid beit shaphrang. Baroh ki klob ki la mynjur ïa ki jingtyrwa kiba ngi la pynpaw ban khot ïa ki nongkyrshan kiba lah ban wan ban ïasnoh kti lang bad ka jingthmu ka la long kaba ïaid beit na ka bynta wanrah ïa ki lad pathai khubor na ka bynta ki jingïalehkai I-league, kynthup ïa ka IWL bad kiwei kiwei pat ki lympung kiba la pynïaid da ka AIFF.
“Ki la pynpaw ïa ka jingsngew-nguh ïa ka AIFF da kaba ong ba ka dei ka jingthmu kaba biang bha, kaba dei ka jingkynthoh kaba pdiang sngewbha na ki klob I-League. Kyrmen ba ngin lah ban sdang ïa kane ka lympung ha ka taïew kaba ar jong u Naiwieng namar ba ka jingïalehkai kan sdang ha ka 22 tarik u Naiwieng. Kata ka dei kaba ngi la rai bad ki la don ar tylli ki mat kiba la wanrah da ki klob I-League, kiba dang bishar bniah da ka AIFF. Nga ngeit skhem, ba kane ka lympung kan long kaba ïaid beit shakhmat haduh kaba kut”, la bynrap u Secretary General ka AIFF.
Kat kum katei ka prokram, la ong ba ka Lajong kan pynkhreh biang ïa ka jingïalehkai ha la ïing ha ka 30 tarik u Naiwieng pyrshah ïa kawei pat ka kynhun na Goa, ka Dempo SC bad ha ka 5 tarik u Nohprah ïa ka Inter Kashi.
