Shillong, Risaw 25
Ka Mawreng Junior Academy ka la pynliem noh ïa ka Mawkma Youth Club da 2-0 kol ha ka semi final (1st leg) jong ka lympung ïalehkai U-14 Football Tournament 2024 ba la pynïaid da ka Maraikaphon Youth Club ha madan Maraikaphon kaba ha Sohra.
Kane ka jingïakhun kaba la long kaba itynnad bad kaba ïakhaid bha ha kaba baroh ar ki kynhun ki la pyrshah ban ïakhun tyngeh naduh kaba sdang. Ka Mawreng Junior Academy ka la ïoh ban pynkhih jar nyngkong eh lyngba u Banshanbor Nongrum ha ka minit ba 23. Kane ka kynhun ka la thep biang ïa ka kol kaba ar lyngba u Edilbert Dkhar ha ka minit ba 57. Haduh kaba kut ka Mawkma kam shym la lah ban pynphai bad ka la mad ïa ka jingshah rem.
Lyngba kane ka jingjop ka Mawreng Junior Academy ka la don jingkyrmen ban ïoh rung sha ka final bad kan donkam ban ïakhun tyngeh ha ka semi final (2nd leg) ka ban long ha ka 29 tarik mynta u bnai.
Kawei pat ka semi final (1st leg) kan long hapdeng ka Seng Samla Mawmluh pyrshah ïa ka Maraikaphon Youth Club ha ka sngi Saitjaiñ.
