Khliehriat, Risaw 26
Ka Chiehruphi SYWSC bad Wahïajer Narpuh ki la khur jingjop ha ka Super Division na ka bynta ka 6th Kyrmen Shylla Contribution Trophy ba la pynïaid da ka East Jaiñtia Hills District Football Association.
Ha ka jingïalehkai kaba nyngkong kaba la long ha ka lah sngi U Blei ha madan Diengshynrum kaba ha Khliehriat, ka Chiehruphi SYWSC ka la pynliem ïa ka Rymbai Skhenshynriah SC da 5-0.
U Meshwa Lapasam u la thep ar kol ha ka minit kaba 69 & 81, katba ïa kiwei pat la thep da u Wanrilangki Lamare (26), Regency Lapasam (54), bad u Wanshanme Bareh (71).
Da kane ka jingshah rem, ka Rymbai Skhen-shynriah kaba long ka lahduh ha u snem ba la lah, mynta ka kynti ka la shah pynhiar noh sha ka First Division lem bad ka Thangskai Tiger SC.
Haba phai sha kawei pat ka jingïa-lehkai, ka Wahïajer Narpuh ka la pynliem ïa ka Shilliang Umshong da 1-0 kol bad ïa kane la thep da u Francis Sumer ha ka minit kaba 5.
