Amlarem, Risaw 26
Ka Mupyut Dongwah ka la khur jingjop ha ka First Division ba la pynïaid da ka Amlarem Sub-Division Sports Associa-tion ha ka lah sngi U Blei ha Mini Stadium Ladjaplem.
Kane ka nam jop ka la wan hadien ba ka la pynliem noh ïa ka Samanong da 1-0 kol bad kane ka shi kol ka la wan urlong ha ka kylla miet lyngba u Riros Phawa, uba la thep ha ka minit kaba 73.
Ha ka jingïalehkai jong ka Second Division, ka Amjajer Roko SC bad ka Tyllilang SC ki la ïasam mar shi poiñ hadien ba ki la ïakhaid da mar 2-2.
Ka Amjajer Roko ka la pynkhih jar nyngkong ha ka minit kaba 6 lyngba u H. Nongrum bad ka la pynbud biang sa shi kol lyngba u K. Nongrum (47). Katba ka Tyllilang ka la pynphai kylla ar kol lyngba u T. Nyalang (50) bad u K. Myrmen (60).
Ha ka jingïalehkai kaba bud hapdeng ka Syndai Kmai Shnong bad Darang ki la ïakhaid mar 2-2 kol.
Ïa ki kol na ka Darrang la thep da u Nakiman Suting (9) bad u Mebantei Suting (53), katba ka Syndai Kmai Shnong ka la pynphai kylla lyngba u Fairmon Pohplet (20) bad u Hiymon Pohplet (59).
