Washington, Risaw:
Katkum ki khubor, la ong ba mu King Charles III ha kane ka kynti u la pynbna ia ki jingthmu jong u ban leit shang kai pyrthei bad ban leit jurip kylleng ki jaka wat hadien ba la lap ia ka jingpang bampong ha ka met jong u.
Kumta, utei u nongialam u la ong ba un leit ban her shabar jong ka ri ha une u snem ban wan, khlem da pynsep-ei ia ka por ba dang sah namar um tip lano ka ka jingim jong u kan kut bad kumta, u la rai ban pyndep ia ki jingthmu jong u kumba u la pynbeit baroh shi katta bad un nym phai dien na kaei kaba u la mut ban leh watla u la lap ba u don ia katei ka jingshitom hadien ba la wan peit bniah ha kine ki khyndiat por ba la leit.
Namar ki doktor kiba dei peit ia u King Charles, ha une hi u snem ki la shem ba u Charles u don ia ka jingpang bampong. Hynrei, ki la iathuh ba u lah ban pynsangeh ne pynjlan ia ka jingsumar jong u shipor naka bynta ka jingleit jong u sha Australia bad Samoa.
Na ka liang ka iing syiem, ha u Iaiong jong une u snem, ka la pynbna ba u Charles un kham pynduna noh ia ka jingmih ha ki kam paidbah namar ka jingbym khlaiñ shuh jong ka met hynrei la ong ba ki doktor ki pyntip ba ka dang long kaba lah ban sumar ia katei ka jingshitom kaba u don watla u la kot ia ka rta kaba la rangbah bha.
La ong ba katei ka jingleit jurip jong utei u syiem sha Australia, kan long ka sien ba nyngkong ia u kum u syiem, naduh ba u la ioh shimti ia katei ka shuki hadien ka jingiap jong ka Queen Elizabeth ha u Nailur jong u snem 2022.
